Në emisionin “Opinion” po trajtohet tema “Censi, a duhet ta deklarojmë fenë dhe kombësinë?”.
Lidhur me këtë proces që po zhvillohet prej disa ditësh në vendin tonë, ka folur avokati dhe pedagogu, Alket Hyseni.
Ai shprehet thotë se Shqipëria ka standardin më të lartë që ekziston në botë lidhur me Censin dhe mbrojtjen e minoriteteve.
Blendi Fevziu: Pse duhej të vendosej etnika dhe feja?
Alket Hyseni: Ne si përherë, jemi prirur të mbajmë standardet më të larta. Sa më lart të hipësh, aq më shumë rrezikon. Të mbash standardet e larta, kërkon dhe një standard të lartë të zhvillimit shoqëror të vendit dhe ndoshta nuk përputhet standardi shumë i lartë i ligjit që kemi ne me standardin e zhvillimit në këtë stad të shoqërisë tonë. Fakt, ne kemi standardin më të lartë që ekziston në botë lidhur me Censin dhe mbrojtjen e minoriteteve.
Blendi Fevziu: Kush janë pikat më sensitive në këtë ligj?
Alket Hyseni: Patjetër, identiteti etnik.
Blendi Fevziu: Kur u bë ligji, a keni pasur shqetësim për identitetin etnik?
Alket Hyseni: Shqipëria paraqet një kompleksitet si askush tjetër. Ne kemi shkallën më të lartë të minoriteteve, 9 minoritete. Projektligji ka ardhur me 8 dhe në diskutime dhe në debate dhe në lobimin e qeverisë bullgare e partnerëve evropianë, është shtuar minoriteti bullgar. Në stadin ku është Shqipëria, jemi më të brishtë se në situata të caktuara për etapat e integrimit. Nga pikëpamja e së drejtës, ne duhet të jemi krenarë sepse kemi standardin më të lartë të pakicave kombëtare. Me këtë shkallë të shoqërimit, por edhe të mbrojtjes, mund të jemi në standardet më të larta.
