Tre të rinj janë shpallur në kërkim për terrorin që shkaktuan tre javë më parë në një lokal në Zejmen të Lezhës ku u futën të armatosur me kallashnikov duke kërkuar kushëririn e pronarit me të cilin miku i tyre ishte në konflikt.
Njëri prej autorëve është nipi i deputetit të PS Rrahman Rraja, Ramazan Rraja, ndërsa janë zbuluar identitetet edhe të dy personave të tjerë të cilët janë Roan Brahimi dhe Alesio Dobrozi.
Të tre personat rezultojnë të jenë emra të njohur për drejtësinë. Ata rezultojnë me precedentë të mëparshëm kriminal në fushën e krimeve ndaj personit, armëmbajtjes pa leje dhe narkotikëve, ndërkohë që menjëherë pas ngjarjes së ndodhur në Lezhë janë larguar jashtë vendit.
Roan Brahimi është arrestuar më parë në 16 Maj të vitit 2018 në Lezhë, pasi gjatë kontrollit iu gjetën dhe sekuestruan armë, municione, Euro dhe bizhuteri të dyshuara të vjedhura. Sipas policisë tre vite më parë i gjetën një armë zjarri pistoletë “Bereta” me një krehër me 15 fishekë, 14.600 Euro dhe një sasi bizhuterish.
Këto materiale u sekuestruan gjatë kontrollit të mjetit tip “Lancia” që drejtohej nga Brahimi. Alesio Dobrozi është i treti i shpallur në kërkim. Ai rezulton i dënuar në 2019 nga drejtësia italiane për vjedhje dhe grabitje./Opinion.al
