Punonjësit e administratës do të kenë fleksibilitet në oraret e punës, duke pasur mundësi të përcaktojnë vetë kur do të nisin ditën e punës.
Lajmin e bëri të ditur ministrja e Shtetit për Administratën Publike dhe Antikorrupsionin, Adea Pirdeni.
Vendimi i cili u propozua dy javë më parë, u miratua këtë të enjte në mbledhjen e Këshillit të Ministrave.
“Miratimin e rregullave për kohëzgjatjen e punës dhe të pushimit, orët shtesë dhe kompensimin e tyre në institucionet e administratës shtetërore, institucionet e pavarura dhe institucionet e pushtetit vendor.
Parashikohet për herë të parë konceptimi në legjislacion konceptimi i orëve fleksibël të punës për të garantuar një balancë më të mirë mes punës dhe jetës private të të gjithë punonjësve.
Në bazë të këtij vendimi parashikohet që ndërkohë që kohëzgjatja ditore e punës mbetet e njëjta, pra nga e hëna në të enjte 8 orë e 30 minuta, ndërsa ditën e premte 6 orë. Punonjësit mund të zgjedhin ta nisin ditën e punës me herët dhe ta përfundojnë më vonë ose ta nisin më vonë dhe ta përfundojë më vonë, duke garantuar që të gjithë punonjësit janë prezent në zyrat e tyre në një fashë orare nga 09:30-15:30 nga e hëna në të enjten dhe nga ora 09:30-13:00 ditën e premte”, tha ministrja.
Po ashtu, ministrja prezantoi edhe rregullat e reja për akordimin e pushimeve vjetore jo vetëm për punonjësit e administratës, por edhe për sektorin privat.
“Ky vendim përcakton edhe disa rregulla për akordimin e pushimeve vjetore. Kjo e drejtë mund të delegohet nga drejtuesi i institucionit ose nga sekretari i përgjithshëm tek drejtuesi i departamenti i burimeve njerëzore për të optimizuar procesin e dhënies së lejeve.
Dëshiroj të theksoj se më 26 korrik Kuvendi miratoi ndryshimet në kodin e punës për të garantuar një tjetër element fleksibël në mënyrën si menaxhohet gjithë procesi i pushimeve për të gjithë punonjësit e administratës publike, por jo vetëm edhe për sektorin privat. Në ndryshimet e kodit të punës është hequr kufizimi sipas të cilit punonjësit nuk mund të merrnin leje vjetore në një kohëzgjatje më pak sesa një javë kalendarike. Është përcaktuar që kohëzgjatja vjetore e pushimeve është 22 ditë pune ku janë shtuar edhe dy ditë ekstra për të gjithë punonjësit”, tha ministrja.
