Nga dita e sotme kanë hyrë në fuqi masat e reja për lëvizjen e qytetarëve në Kosovë ku ajo që bie në sy është detyrimi për të vendosur maskë në ambjente publike.
Rritja e numrit të rasteve me COVID-19 bëri që qeveria të shtrëngojë në mënyrë drastike masat duke kufizuar në vetëm 90 minuta lëvizjen dhe duke paralajmëruar gjoba të larta për ata që i thyejnë ato.
Ministri i Shëndetësisë, Arben Vitia tha në një konferencë për mediat se nga data 15 prill, qytetarët kanë të drejtë të lëvizin në rrugë vetëm për 1 orë e gjysmë në ditë.
“Që nga data 15 prill në ora 06:00 ndalohet qarkullimi i personave fizikë jashtë shtëpive, përveç për furnizim me ushqim dhe barna, si dhe për detyrat e nevojat financiare per 1 orë e gjysmë në ditë. Personave të moshuar u rekomandohet të mos dalin fare nga shtëpitë përveç në raste urgjente. Qytetarët e Kosovës janë të obliguar që kur dalin në rrugë të mbajnë maska ose mbulesa tjera për pjesën e gojës dhe hundës. Kur dalin në rrugë, personave fizikë nuk u lejohet shoqërim nga asnjë person, përveç në dy raste, personave me aftësi të kufizuara dhe personave nën 16 vjeç”, tha ministri Vitija.
Ai paralajmëroi se mosrespektimi i masave të këtij vendimi konsiderohet kundërvajtje administrative dhe dënohet prej 1 mijë deri në 2 mijë euro gjobë për personat fizikë dhe 3 mijë deri 8 mijë euro për personat juridikë.
Ndërkohë AAK dhe LDK e kanë shfytëzuar këtë rast për të akuzuar qeverinë e Kosovës se po shkel Kushtetutën dhe të Drejtat e Njeriut.
“Kushtetuta e vendit të mbrohet nga cënuesit e saj. Qeveria e shkarkuar është cënuesi kryesor i saj. Pas vendimit të Gjykatës Kushtetuese kjo qeveri është recidiviste në shkelje. Vendimi për këtë kufizim nuk ështe një vendim që i përket specifikave të vendit tonë. Ky vendim e bën të pamundur zbatimin e tij nga institucionet. Qytetarit i është shkelur e drejta në bazë të specifikave dhe i është pamundësuar të kryej detyrat bazike në kohën e caktuar prej 1 orë e 30 minuta. E ftojmë qeverinë e shkarkuar ta respektoj Kushtetutën dhe t’i zbatojë ligjet në vend”, tha në reagimin kreu i AAK, Ramush Haradinaj.
“Vendimet që Kryeministri në detyrë na i lexoi mbrëmë në “natën historike” përmes gojës së Ministrit të Shëndetësisë, janë shqetësuese. Ato kapërcejnë çdo kufi të një shteti demokratik. Sipas këtyre vendimeve, qytetarët e Kosovës nuk janë qytetarë me të drejta të garantuara kushtetuese. Qeveria në detyrë nuk është qeveri e një shteti parlamentar. Ajo nuk po e respekton Kushtetutën dhe Aktgjykimin e Gjykatës Kushtetuese. Ministritë e caktuara janë bërë vet ligji”, tha kreu i LDK, Isa Mustafa. /Opinion.al
