Trajneri i Shqipërisë, Gianni De Biasi, ka ditur ditur të menaxhojë nervat dhe tensionin pas disfatës së thellë me rezultatin 0-3, të pësuar mbrëmjen e të shtunës në “Elbasan Arena” përballë Izraelit. De Biasi ka theksuar faktin që skuadra i ka pëlqyer më shumë pasi kaloi në inferioritet numerik dhe pas kalimit në disavantazh. Ai nuk i atakoi drejperdrejt, por la të kuptuar pakënaqësinë me arbitrat.
“Unë nuk dua të sulmoj arbitrat. Besoj e thashë që para ndeshjes se kjo parashikohej të ishte një ndeshje e vështirë ndaj një kundërshtari shumë të fortë. Padyshim që ai gol i shpejtë dhe ai karton i kuq kanë ndikuar në lojë dhe në rezultatin final. Kemi luajtur si në ndeshjen ndaj Zvicrës dhe Francës, kur na eci shumë mirë. Pas golit të parë mendova të aktivizoj një sulmues më shumë. Personalisht mua ekipi më ka pëlqyer më shumë kur ishte me dhjetë dhe me nëntë futbollistë se sa kur ishte me njëmbëdhjetë lojtarë. Nuk mund të them se kjo ishte ndeshja më e çuditshme e karrierës time, por mund të them se episodet nuk ishin në favorin tonë. Në këtë rezultat edhe ne kemi fajet tona, sikurse ishte rasti i golit të parë”, deklaroi trajneri i Shqipërisë, Gianni De Biasi.
