Të paktën 31 persona kanë vdekur dhe shtatë të tjerë janë plagosur në qytetin kinez Yinchuan, pas një shpërthimi gazi në një restorant.
Shpërthimi ndodhi mbrëmjen e djeshme dhe dyshohet të jetë shkaktuar nga një rrjedhje gazi të lëngshëm brenda restorantit.
Sipas mediave të huaja, nga shtatë të plagosurit, një person është ende në gjendje kritike për jetën. Gjashtë të tjerët po trajtohen në spital për lëndime të lehta, djegie dhe prerje në zona të ndryshme të trupit.
Autoritetet lokale të zjarrfikësve dërguan 20 automjete në vendngjarje, me operacionet e kërkim-shpëtimit që zgjatën deri në orën 4 të mëngjesit të së enjtes, sipas medias shtetërore.
Intervistat nga policia dhe zjarrfikësit në vendngjarje zbuluan se dy punonjës të restorantit kishin nuhatur gaz rreth një orë para shpërthimit. Shpërthimi ka ndodhur kur dy punonjësit po ndërronin valvulin e thyer të rezervuarit të gazit.
Udhëheqësi kinez Xi Jinping e quajti incidentin “zemërthyes” dhe tha se ishte një “mësim i thellë”.
Xi shtoi se është e domosdoshme trajtimi i të plagosurve dhe ngushëllimi i familjeve të viktimave dhe zbulimi i shkakut të aksidentit sa më shpejt të jetë e mundur. Ai gjithashtu urdhëroi autoritetet përkatëse qeveritare të kryejnë një rishikim të rrezikut të sigurisë dhe të forcojnë mbikëqyrjen e sigurisë në sektorët kyç, raportoi CCTV.
Incidenti ndodhi pak përpara se Kina të fillonte festën e saj kombëtare tre-ditore, nga e enjtja deri të shtunën, duke shënuar Festivalin e Varkave të Dragoit.
Vendi është tronditur nga një sërë incidentesh sigurie këtë vit. Një shembje në një minierë qymyri në Mongolinë e Brendshme në shkurt la 53 të vdekur; më pas në prill, zjarri më vdekjeprurës që goditi Pekinin në dy dekada, vrau 29 njerëz në një spital./Opinion.al
