“Ka Një Mesazh Për Ty” nisi me një bisedë ndryshe mes protagonistes, Vekos dhe moderatorit të së “Dielës Shqiptare” në Tv Klan, Ardit Gjebreas. Ky i fundit i përshkroi fillimisht studion e ideuar nga mjeshtri Gaetano Castelli, publikun e dashur e më pas pamjen e tij ku nuk i kurseu disa batuta.
E gjithë kjo sepse Veko nuk mund të shohë. Historia e saj nuk është aspak e lehtë dhe jo vetëm prej gjendjes, por edhe ngjarjeve që kanë shoqëruar jetën e saj. Veko lindi në vitin 1984 në fshatin Dodovec në Berat, nga një nënë që s’e njohu dot kurrë dhe një baba që e takoi kur ishte 17 vjeçe.
Veko: Kam lindur me shikim të kufizuar, qoftë edhe me shikim 0, pra nuk arrij të shikoj asgjë, por arrita përmes intuitës, përmes shkollës, përmes punës që të bëhem pjesë e kësaj Tirane të madhe dhe e formësova jetën time.
Ardit Gjebrea: Po ti më trego pak për prindërit e tu.
Veko: Në fakt, nënën time nuk arrita ta njoh. Babain tim arrita ta njoh kur isha 17 vjeç, kreva shkollën 8-vjeçare te instituti…
Ardit Gjebrea: Po pse, deri 17 vjeç ku u rrite?
Veko: Unë jam rritur në fakt sa te instituti që shkollohesha dhe pushimet verore, pushimet e Vitit të Ri i kaloja në Shtëpinë e Fëmijës në Tiranë.
Në moshën 6-vjeçare, Veko u njoh me Mondën dhe Maksimin që bënë gjithçka për të, i përgjigjeshin pyetjeve të saj të pafundme që sot janë pakësuar dhe u përpoqën të gjenin familjen biologjike të Vekos.
Ajo arriti të takonte të atin dhe dy motrat, si dhe mësoi më shumë për emrin e saj. I ati e kishte dashur kaq shumë nënën sa e kishte quajtur Ervehe. Pamundësia ekonomike bëri që Veko të përfundonte në jetimore dhe më pas u shkëputën gabimisht, por palët nuk i reshtën përpjekjet për t’u rilidhur.
Shikimin Veko e humbi rreth moshës 2-3 vjeçare për shkak të një djegieje dhe pavarësisht provave për ta rikthyer, ishte e pamundur.
Ardit Gjebrea: Po ti kështu ke lindur, me pamundësinë për të parë?
Veko: Jo, nuk kam lindur kështu. Kam pësuar një djegie, kështu flitet.
Ardit Gjebrea: Kur ishe e vogël?
Veko: Po, kur isha e vogël. Teta Monda dhe xhaxhi Maksi pastaj u përpoqën shumë dhe një njeri tjetër që unë nuk do të harroj ta përmend sa të kem jetën time është doktoresha Xhanet Gudoll e cila ka qenë pediatre dhe jeton në Angli. Sot është 94 vjeçe. Mundësoi që unë të shkoja në Angli dhe të rregulloja disi atë dëm që ishte bërë.
Ardit Gjebrea: Sa vjeçe ishe, apo ishe muajshe?
Veko: 2-3 vjeçe kur ndodhi kjo.
Ardit Gjebrea: Dhe që nga ai moment ti nuk pe më.
Veko: Jo./tvklan.al
