Mëngjesin e sotëm Bashkim Fino, deputet i Partisë Socialiste dhe ish-kryeministër i vendit u nda nga jeta në moshën 59-vjeçare.
Në një njoftim për mediat, Kryesia e Kuvendit ka bërë me dije se homazhet për deputetin socialist Bashkim Fino do të mbahen ditën e sotme në pallatin e Kongreseve nga ora 11:00 deri në orën 16:00.
“Kryesia e Kuvendit të Shqipërisë njofton më hidhërim të thellë se sot në orët e para të mëngjesit u nda nga jeta deputeti Bashkim Fino. Kryesia e Kuvendit i shpreh ngushëllimet familjes dhe të afërmve dhe njofton se në nderim të deputetit Bashkim Fino, sot, më 29 mars, nga ora 11:00- 16.00, do të organizohen homazhe në Pallatin e Kongreseve”, thuhet në njoftim.
Bashkim Fino, ish-kryeministër dhe një nga deputetët më të spikatur në radhët e PS, ka ndërruar jetë pasi nuk e ka fituar dot betejën Covid-19./Opinion.al
