Nga aksidenti tragjik i ndodhur mbrëmjne e djeshme në aksin rrugor Milot-Morinë, ka arritur që të shpëtojë vajza më e vogël e familjes. Bëhet fjalë për një 3-vjeçare që aktualisht është duke u trajtuar në spitalin e Traumës në Tiranë.
Ambasadori i Kosovës në Shqipëri, Nait Hasani, ka konfirmuar se gjendja e vogëlushes së mbijetuar vazhdon të jetë e rëndë.
“Sapo fola me mjekun në spitalin e Traumës në Tiranë. Sipas mjekut vogëlushja ka lëndime të rënda trupore dhe thyerje të eshtrave. Gjendja e saj tashmë është më stabël dhe mjekët po shpresojnë që do të përmirësohet”, ka thënë ai për “Express”.
Kujtojmë se kryefamiljari B.A 49-vjeç së bashku me bashkëshorten dhe fëmijët e tij që po udhëtonin nga Kosova drejt Shqipërisë është përplasur tragjikisht me një kamion. Të vdekur në vend kanë mbetur 4 pjesëtarët e familjes kosovare. Ndërkaq, drejtuesi i kamionit po nga Kosova , mbrëmë është shoqëruar nga policia për t’u marrë në pyetje.
Dyshimet e para janë se makina me të cilën udhëtonte familja kosovare ka tentuar të parakalojë automjetet në kthesë, ku edhe nuk ka mundur ta shoh kamionin që vinte në drejtim të tij. Në atë moment ndodhi edhe aksidenti. /Opinion.al
