Khalil, 36 vjeç, inxhinier kompjuteri në spitalin Al-Najjar në Rafah dhe baba i katër fëmijëve të vegjël: Ibrahimit, 9 vjeç; Amal, pesë vjeç; Kinani, 2 e gjysmë dhe Rosa 18 muajshe.
Ai po punonte në spital kur një bombë shpërtheu në afërsi të shtëpisë së tij, më 20 tetor, shkruan BBC.
“Një bombë masive shpërtheu,” tha ai.
“Fqinjët e mi po vinin në spital. Kështu që unë pyeta: “Ku ishte bombardimi?” Dhe ata më thanë: “Ishte rreth shtëpisë sate”. M’u desh të vrapoja në vendndodhje për të kontrolluar familjen. U përpoqa të telefonoja, por askush nuk po përgjigjej. Dhe siç mund ta shihni… e gjithë shtëpia ishte bombarduar.”
Njëmbëdhjetë anëtarë të familjes së tij u vranë, në mes të viktimave ishin katër fëmijët e tij, dy motrat e tij, babai i tij 70-vjeçar, vëllai dhe kunata e tij dhe dy vajzat e tyre.
Ndërkohë, bashkëshortja e tij u plagos rëndë. Ajo po trajtohet për djegie dhe lëndimet e tjera të marra nga shembja e shtëpisë.
“Unë kisha ëndrra për secilin nga fëmijët e mi. Ibrahimi ishte i pari në shkollën e tij dhe unë ëndërroja ta shihja atë si mjek një ditë. Amal ishte shumë kreative, i pëlqente të vizatonte. Dhe më tregonte vizatimet e saj. Kinani ishte shumë lozonjar – të gjithë e donin. Dhe ai kujdesej për motrën e tij të vogël. Ai ishte gjithmonë aty për të mbrojtur Rozën dhe thoshte: “Mos e prek, ajo është fëmija im!” Dhe tani ata janë zhdukur të gjithë”, tha 36-vjeçari./Opinion.al
