Një foshnje vetëm 1 vjeç ka humbur jetën në spitalin e Elbasanit. Për këtë rast policia ka nisur hetim ndaj tre mjekëve, pasi akuzohen për mjekim të pakujdesshëm. Mësohet se hetimi ka nisur ndaj mjekëve E.L, 57 vjeç, F.B, 51 vjeç dhe D.B, 56 vjeçe.
Foshnja nga Zavalina e Elbasanit ndërroi jetë një natë më parë në spitalin kirurgjik të Elbasanit, pasi ishte sjellë nga prindërit e tij në gjendje të rënduar, me pjesët respiratore të bllokuara.
Dyshohet që fëmija të ketë qenë në këtë gjendje si pasojë e komplikacioneve të një viroze, por pavarësisht ndihmës së dhënë fëmija nuk ka mundur të mbijetojë.
Ishin prindërit të cilët menjëherë pas ngjarjes ngritën pretendimin për mjekim të pakujdesshëm nga ana e mjekëve. Në këto kushte, policia në bashkëpunim me Prokurorinë kanë nisur hetimet ndaj mjekëve E.L 57 vjeç me banim në Elbasan, F.B 51 vjeç me banim në Librazhd dhe mjeken 56 vjeçare me inicialet D.B me banim në Elbasan. Prokuroria do t’i hetojë mjekët për veprën penale “mjekim i pakujdesshëm”.
Trupi i foshnjës po i nënshtrohet ekspertizës mjeko/ligjore për të përcaktuar shkaqet e vdekjes dhe përgjegjësinë e personelit mjekësor në vdekjen e tij.
