Ditën e sotme është shënuar aksidenti i parë me vdekje për vitin 2020. Ngjarja e rëndë ka ndodhur në kryeqytet, ku për pasojë e përplasjes së dy makinave kanë mbetur viktimë dy persona. Dy viktimat kanë qenë një burrë dhe një grua.
Bëhet me dije, se një nga personat që humbi jetën në aksidentin e sotëm është identifikuar si Erion Balla, 36 vjeç, ndërsa gruaja është identifikuar me inicialet H.S. 72-vjeçe.
Aksidenti ka ndodhur në zonën e quajtur “Xhamlliku”. Në vendin e ngjarjes ka shkuar ambulanca, ndërsa forcat e policisë kanë shoqëruar dy drejtuesit e mjeteve, Edmond Murati dhe Eljon Lazri, të cilët gjithashtu kanë pësuar lëndime. Dyshohet se shkak i aksidentit është bërë parakalimi i gabuar prej një nga automjetet e përfshirë në aksident.
Ndërkohë, janë publikuar dhe pamjet të cilat janë kapur nga kamerat e sigurisë që ndodhen në atë zonë. Siç shiheh në video, Golf-i i pret rrugën automjetit tjetër duke i prishur ekulibrin. Nga pamjet duket se si automjeti tjetër del nga rruga dhe më pas përplas dy këmbësorët për vdekje.
Njoftimi i policisë
Tiranë/ Informacion Paraprak
Rreth orës 15:15 në rrugën “Xhanfize Keko” automjeti me drejtues E. L, është përplasur me automjetin me drejtues E. M.
Si pasojë e përplasjes janë përshirë në aksident dhe dy këmbësor të cilët kanë ndërruar jetë në vendngjarje. Dy drejtuesët e automjeteve E. L dhe E. M janë shoqëruar në komisariat për veprime të mëtejshme hetimore.
Policia rrugore ndodhet në vendngjarje, ku po vijon punën për sqarimin e rrethanave të ngjarjes dhe identifikimin e dy shtetasve që ndërruan jete./Opinion.al
