Ylli Mihali, fizioterapisti i Kombëtares Shqiptare të Futbollit, ka ndërruar jetë si pasojë e Covid-19. Lajmin e dha kreu i FSHF, Armand Duka në një postim në rrjetet sociale.
“Të dashur miq, Pak minuta më parë u njoha me lajmin e kobshëm se Ylli Mihali, njeriu i mirë, fjalëpak, u nda nga jeta pas një betejë të gjatë e stërmunduese me Covid-19. Ky është një moment i vështirë për të gjithë futbollin shqiptar, që e njofti dhe e dashuroi aq shumë Yllin, që emrin e reflektonte në çdo hap dhe moment të jetës së tij. Një fizioterapist dhe një njeri i jashtëzakonshëm që shërbeu për 27 vite pranë ekipit tonë Kombëtar, pranë klubit të tij Tiranës, pranë sportistëve në vështirësi, duke qenë pranë tyre në ҫdo situatë. Humori, dashuria për njerëzit, dhembshuria e Yllit do të na mungojnë. Në këtë moment të vështirë për familjen e tij, miqtë e tij të shumtë, lutemi që shpirti i tij të prehet në paqe. Lamtumirë Yll, do të të kujtojmë gjithmonë me dashuri!”, shkruan Duka.
Prej ditësh, Mihali ishte i shtruar në spital me Covid-19. Ylli Mihali ka qenë pjesë e Kombëtares për rreth 30 vite, ndërkohë që ka dhënë kontributin e tij edhe te klubi i Tiranës./Opinion.al
