Një qytetare është drejtuar në redaksinë e emisionit “Stop” në Tv Klan pasi është përballur me një situatë të tmerrshme. Ajo tregon se ka bashkëjetuar 5 vjet me një burrë e më në fund, me dëshirën e të dyve mundi të ngelte shtatzënë. Sipas qytetares, kur ish-gruaja e bashkëjetuesit të saj e merr vesh, e kërcënon dhe partneri e dhunon denoncuesen deri në pikën që ajo humbi fëmijën.
Si të mos mjaftonte dhuna dhe humbja e fëmijës, zonja mëson nga një i afërm i saj se ish-bashkëjetuesi i kishte bërë kallëzim për përndjekje, duke pretenduar se ajo i shkruante gruas dhe fëmijëve të tij nga adresa false. Zonja thotë se nuk është njoftuar për këtë proces hetimor asnjëherë dhe madje nuk u thirr as për ballafaqim me justifikimin se nuk njihej si banore në lagjen ku ajo banon prej 20 vitesh.
OPGJ Arjan Koxha: Urdhëro!
Qytetarja: Alo! Arjan, të përshëndes!
OPGJ Arjan Koxha: Përshëndetje! Si ia kalove?
Qytetarja: Fakti që më ka habitur Arjan është sesi ka mundësi që keni pasur adresën time të saktë dhe deklaron me shkrim që unë nuk jam banore e këssaj zone, ndërkohë që unë e kam edhe emrin te citofoni poshtë shtëpisë.
OPGJ Arjan Koxha: Po nuk të njoh, të lutem! Më kupto drejt!
Qytetarja: Nuk është puna për të më njohur, por pse s’ke ardhur një herë Arjan? Ne jemi të dy në të njëjtën lagje, unë të shikoj përditë kur kalon dhe ti më shikon përditë, si ka mundësi?
OPGJ Arjan Koxha: Nuk të njoh! Kërkova shkresat tek kompjuteri, që mbase mos gjeja ndonjë të dhënë dhe realisht nuk kam gjetur asnjë të dhënë. Ne, gjënë e parë që bëjmë, është që e verifikojmë tek njësia administrative.
Qytetarja: Po, por ju këtë gjë nuk e keni bërë.
OPGJ Arjan Koxha: Po të lutem, ku e di ti? Tani, unë po ta shpjegoj si motër ose si qytetare. Ku të kam kërkuar? Në gjendjen civile dhe në lagje me administrator pallati se në vend tjetër nuk të kam kërkuar.
Qytetarja: Po pra, por edhe administratori më njeh se kam 20 vjet në të njëjtin pallat.
OPGJ Arjan Koxha: Duke mos të të gjetur, unë kam çuar një informacion që unë nuk e njoh dhe nuk e kam gjetur.
Qytetarja: Ju keni dërguar një informacion që zonja nuk njihet si banore në këtë lagje, ndërkohë që në njësinë administrative bashkiake, unë jam.
OPGJ Arjan Koxha: Unë, nuk të njoh…
“Stop” takon ish-partnerin e denoncueses, i cili i mëshon versionit se nuk ka pasur dhunë, por ka qenë zonja ajo që e ka përndjekur. Madje ai mohon që zonja të ketë qenë shtatzënë, edhe pse për këtë ekzistojnë dokumente e raporte.
Gazetarja: Sa ka qenë lidhja? Keni thënë se keni patur një lidhje disa mujore.
Ish-bashkëjetuesi: Të lutem! Të lutem!
Gazetarja: Keni thënë se keni patur një lidhje disamujore?
Ish-bashkëjetuesi: Të lutem, se kjo çështje është në gjykatë. Unë kam një familje. Ti, në qoftë se e nxjerr këtë…Kam një familje.
Gazetarja: Çfarë, në qoftë se e nxjerr?
Ish-bashkëjetuesi: Kam një reputacion.
Gazetarja: E keni dhunuar zonjën?
Ish-bashkëjetuesi: Unë? Asnjëherë! S’e kam prekur me dorë asnjëherë. Unë jam dhunuar nga ajo.
Gazetarja: E dyta, ti ke pasur dijeni që ajo ka qenë shtatzënë.
Ish-bashkëjetuesi: Ça shtatzënë? Të të tregoj dhe ato false që ka nxjerrë ajo nga klinika dhe hajde shkojmë tani te klinika?
Avokati: Nëse do ta vazhdosh këtë, atëherë unë duhet të kërkoj në gjykatë masë sigurie për emisionin.
Gazetarja: Sa të duash mund të kërkosh, jo masë sigurie, por çfarë të duash ti!
Avokati: Nuk ke punë fare t’i japësh llogari sepse është çështja jote personale.
Gazetarja: Atëherë, mos më jep llogari, por ama në momentin që unë transmetoj disa pretendime, mos thuaj që nuk erdha të marr versionin tënd!/tvklan.al
