Gazetari Artan Hoxha në studion e emisionit “Opinion” në Tv Klan, teksa flet për historinë e jetës së ‘Mbretit të Kokainës’, Pablo Escobar, ka treguar se si e ka nisur ai aktivitetin e tij të paligjshmërisë.
Hoxha zbulon se, Escobar gjithçka e ka nisur me vjedhjen e gurëve të varreve, duke iu fshirë emrin dhe më pas duke i rishitur.
“Ka lindur në një familje të varfër. Ishin shtatë fëmijë dhe ky ishte fëmija i tretë. Fillimisht ai është marrë me grabitjen e gurëve të varreve. Kështu e ka nisur. Ju fshinin emrat dhe i rishisnin. Pra ky është aktiviteti i parë që nga e ka nisur Pablo Escobar. Në adoleshencën e vet u bashkua me kushëririn e vet dhe bashkë më atë e ka kaluar pjesën e adoleshencës dhe gjimnazin nuk e mbaroi, por pas dy vitesh falsifikoi një diplomë gjimnazi dhe u regjistrua në fakultet juridik për avokat. Ëndrrat që kishte nuk përputheshin me statusin që ai kishte në shoqëri”, tha Hoxha.
Ndër të tjera, Hoxha tregon edhe për kontaktin e tij me një kimist nga Kili, takim i cili shënjoi fillimet e tij me trafikun e drogës.
“Praktikisht ai jetonte në një zonë ku idetë që ai kishte nuk përputheshin dhe ai ishte vazhdimisht në kërkim për atë që do ta çonte lartë. Në momentin që ai krijoi grupin me kushëririn e vet dhe njerëz të afërt dhe u lidh me kontrabandistët, aty ai ra në kontakt me një kimist, i cili kishte qenë në Kili. Kili deri në ’73 ka qenë prodhuesi kryesor i kokainës. Trafikantët u larguan nga Kili dhe eksperiencën e fituar aty e shpërndanë në kontinent. Lidhja që bëri me kimistin nga Kili, ai i dha mënyrën dhe i tregoi se sa e leverdishme është kokaina dhe ndërkohë në qytet një trafikante ishte bërë shumë e njohur, e cila po trafikonte në Shtetet e Bashkuara dhe ajo i tregoi Escobar rrugët dhe format se çfarë interesi përbënte kjo lëndë narkotike duke shkuar në SHBA. Kur ai u rrit dhe krijoi lidhje, i shkoi në mendje që këtë tregun mos ta bëjmë ne dhe të krijojmë një aleancë që më vonë u quajt “Karteli i Medelinit’ mes pjesëtarëve të njohur, të cilët ishin njëkohësisht trafikant, por ky kishte atë idenë që ne duhet të krijojmë një aleancë dhe ai arriti duke bërë këtë aleancë”, thekson Hoxha.
Bosi famëkeq i drogës, dhe kreu i kartelit të Medellín, Pablo Escobar, u vra më 2 dhjetor 1993 në qytetin Medellín, në Kolumbi, një ditë pasi kishte festuar 44-vjetorin e tij.
