Gazetari Artan Hoxha, deklaron se në telefonat e tij, të sekuestruar mbrëmbjen e djeshme nga Prokuroria e Krimeve të Rënda, gjenden materiale video e audio të papublikuara që dëshmojnë për aferra korruptive në nivele të larta të politikës shqiptare, që nga rangu i Kryeministrit dhe deri te aktivitetet e paligjshme të administratës shtetërore.
Ai i ka bërë apel Prokurorisë të mos gërmojë në telefonat e tij, sepse si mjete të punës së tij, aty ndodhen histori influencash politike në afera kriminale dhe kontakte qeveritarësh me personazhe të botës së krimit.
Hoxha shtoi se nuk i ka publikuar deri tani këto histori pasi ka qënë duke punuar për ti zbardhur të vërtetat deri në fund.
“Telefonat i dorëzova të fikur, por brenda tyre ndodhet një arkivë e madhe materialesh që unë nuk i kam publikuar. Ndaj i bëj apel Prokurorisë të mos gërmojë më tej në ato mjete punë. Aty ka një video kërcënimi për Santon, ka për Skerdilajd Konomin, ekzekutim të një punonjësi të policisë. Nuk i kam publikuar sepse po punoj me to që të jem i saktë. Janë materiale video e audio që kanë të bëjnë me afera korruptive, që nga rangu i Kryeministrit, histori influencash politike, aktivitete të paligjshme të administratës, kontakte me personazhe të botës së krimit”.-tha Hoxha në studion e News 24.
Hoxha deklaroi se detyra e tij është të zbulojë të vërtetën, në anën e drejtë të ligjit dhe drejtësisë e jo bashkëpunimi me trafikantët.
Opinion.al// A.H
E lidhur: Artan Hoxha: Në telefonat e sekuestruar s’ka mesazhe të miat me pilotin italian
