Gazetari Artan Hoxha ka shkruar se poturet e grisura të Shukriut nuk mund ta mbulojnë dot skandalin e Escobarit të Ballkanit dhe qindra miliona euro të përfituara nga trafiku ndërkombëtar i narkotikëve për të financuar komplekset luksoze turistike dhe fushata të kushtueshme elektorale.
Hoxha shkruan në profilin personal në facebook se çudi e madhe në fakt, sa herë media publikon një skandal të madh kriminal ku përfshihen politikanët më të rëndësishëm në vend, menjëherë publikohet një video erotike me poture të grisura, për të shpëtuar poturet e arta të udhëheqësit të madh.
“Ndërsa prokuroria nuk humbi asnjë minutë kohë të merrej me hetimin dhe shoqërimin në polici të poture-grisurit Shukri, që nuk dilte dot nga dera e shtëpisë prej turpit, poture-floriri i Sarandës i la pendët në derë dhe u zhduk pa lënë gjurmë”, shkruan gazetari Hoxha.
Sipas tij, në rastin e vitit 2006, kur oficerët e policisë kriminale të Sarandës, u kapën duke transportuar me furgon me 750 kilogram hashash Lazarati drejt kufirit grek për hesap të poture-floririt, prokuroria i pushoi hetimet se nuk kishte prova të mjaftueshme.
Ndërsa, thekson se në rastin e fundit, prokurorisë vërtet nuk i mjaftuan 4 ditë për të lëshuar një urdhër-ndalimi dhe për të marrë në pyetje poture-floririn e Sarandës që e kërkon gjysma e Europës dhe është po ashtu funksionar i lartë i shtetit.
Gazetari shkruan, ndër të tjera, se Shukri hamshorit ia hoqi poturet e grisura koka për pesë minuta.
“Qeveria veproi me dy standarde, sipas vlerës në treg që kanë poturet”, shkruan ai në facebook.
Gjithashtu, Hoxha ka theksuar se për të shkarkuar nga detyra e drejtorllëkut poture-floririn iu deshën plot 72 orë nga publikimi i skandalit, ndërsa poture-grisurit Shukri ia zbathi poturet për 72 sekonda.
“Shokë të pushtetit dhe zotrinj të prokurorisë, shtrëngojini fort poturet tuaja prej kashmiri, jo për ta ruajtur prapanicën nga poture-grisurit, por nga poture-florinjtë që po ua gjetën anën, ua zbathin breket nga koka”, shkruan gazetari Artan Hoxha në shënimin e tij të postuar në profilin personal në facebook.
