Prokuroria e Krimeve të Rënda përpara kërkesës për arrestimin e ish-ministrit të Brendshëm, Saimir Tahiri, duhej të kishte kërkuar arrestimin e disa drejtuesve të lartë të Policisë së Shtetit.
Gazetari i kronikës në “News 24”, Artan Hoxha, sonte, në studion e emisionit “Opinion”, deklaroi se policia dhe trafikantët janë ata që drejtojnë kultivimin dhe trafikun e drogës në zonë.
Hoxha tregoi se informatori i çështjes së Devollit, i tha se gjithë drogën në zonë e menaxhon policia me trafikantët.
Ai theksoi se informatori u vra dhe askush nuk u pyet në lidhje me vdekjen e atij personi.
Video:
Gazetari investigativ Artan Hoxha, dy vjet më parë, publikoi të dhëna tronditëse të kultivimit të kanabisit në disa zona të vendit.
Ai dëshmoi me video një fenomen të tillë. Në rastin në fjalë, bëhet fjalë për një zonë në rrethin e Devollit në varësi të Komisariatit të Bilishtit.
Hoxha solli detaje tronditëse nga gjithë ky investigim, duke deklaruar se parcelat ishin në pronësi të dy biznesmenëve, ndërsa ngriti dyshime të forta se policia ishte në dijeni të tyre, pasi kontrollonte çdo makinë që nuk ishte e zonës.
“Kam arsyen dhe bindjen që policia lokale ka patur informacion për kultivimin e lëndës narkotike. Nga dëshmitë që na thanë banorët, këto parcela janë mbjellë nga persona që kanë lidhje me policinë lokale dhe që kanë mbështetje politike”, ka theksuar gazetari Hoxha.
