Kryeministri i Kosovës, Avdullah Hoti nuk do të marrë pjesë në takimin në Shtëpinë e Bardhë në 27 qershor me Serbinë.
Lajmin e ka bërë të ditur vetë kryeministri Hoti në një postim në Facebook.
“Për shkak të zhvillimeve të reja në Prishtinë si rezultat i akuzave të dorëzuara nga Zyra e Prokurorit të Specializuar, më duhet të kthehem në Prishtinë për tu marrë me situatën.
E kam njoftuar Ambasadorin Grenell se nuk mund të marrë pjesë në takimin e datës 27 qershor në Shtëpinë e Bardhë.”- tha Hoti.
Zyra e Prokurorit të Specializuar, ka njoftuar të mërkurën se më 24 prill u ka dërguar Dhomave të Specializuara të Kosovës, me seli në Hagë, një aktakuzë me dhjetë pika për shqyrtim, në të cilën presidenti i Kosovës, Hashim Thaçi, kryetari i Partisë Demokratike të Kosovës, Kadri Veseli dhe të tjerë, akuzohen për një sërë krimesh kundër njerëzimit dhe krimesh lufte ndër të cilat, vrasje e paligjshme, zhdukje e detyruar e personave, përndjekje dhe tortura.
Hashim Thaçi ka anuluar udhëtimin e tij në Uashington, pas ngritjes së aktakuzës nga Zyra e Prokurorit të Specializuar. /Opinion.al
