Një prezantuese televizive u gjet e vrarë në shtëpinë e saj në Rusi. Zhanna Veber, një 29-vjeçare e cila punonte për kanalin televiziv Laba Tv, u gjet pajetë në banesën e saj në rajonin e Krasnodar.
Autor i dyshuar i kësaj ngjarjeje është bashkëshorti i saj, i cili është arrestuar nga policia. Sipas mediave lokale, 29-vjeçarja dyshohet të jetë vrarë në sy të djalit të saj 9-vjeçar Dmitry.
E përditshmja britanike “The Independent” shkruan se ende nuk ka një qëndrim zyrtar për vdekjen e saj. Mediat vendase kanë dhënë versione të ndryshme për mënyrën si është vrarë e reja, megjithatë ajo dyshohet të jetë qëlluar me armë zjarri.
Veber mësohet se ishte e ndarë nga bashkëshorti i saj Anatoly Leotikov, 36-vjeç, prej 2 vitesh dhe dyshohet se shkak për vrasjen është bërë konflikti për kujdestarinë e fëmijës. Ai besohet se është vetëdorëzuar në polici pas krimit.
Laba Tv, ku 29-vjeçarja punonte, e përshkruajti të ndjerën si një gazetare të talentuar. Vdekja e saj ka tërhequr mjaft vëmendjen në rrjetet sociale. Të shumtë kanë qenë ata që kanë shprehur hidhërim për këtë ngjarje të rëndë./tvklan.al
