Mijëra protestues kanë bllokuar rrugët dhe rrjetin e transportit publik që të çon drejt aeroportit të Hong Kongut, një përpjekje kjo për të tërhequr vëmendjen për luftën e tyre për më shumë demokraci për qytetin e udhëhequr nga Kina, që po përballet me krizën më të madhe politike në dekada.
Dhjetëra fluturime raportohet se janë anuluar, teksa protesta e sotme vjen disa orë pasi protestuesit dhe policia u përleshën në qendër të Hong Kongut. Disa protestues ndezën zjarre dhe hodhën koktej molotovi ndërsa policia përdori gaz lotsjellës dhe topa uji ndaj protestuesve.
Protestat në Hong Kong kanë nisur 12 javë më parë, fillimisht për të kundërshtuar një ligj të ekstradimit në Kinë. Më pas qeveria njoftoi se ka hequr dorë nga ligji që do të lejonte që kriminelët e dyshuar të mund të ekstradoheshin në Kinë, por, protestuesit kanë zgjeruar kërkesat e tyre, duke kërkuar një hetim të pavarur dhe demokratik mbi dhunën e dyshuar të përdorur nga policia ndaj protestuesve./Opinion.al
