Homazhet në nder të Mjeshtrit të Madh, Zef Deda, po mbahen ditën e sotme në teatrin “Migjeni”.
Artisti i madh u nda nga jeta në moshën 73-vjeçare pas një sëmundjeje që e mundonte prej kohësh.
Zef Deda me të tjerë figura të ndritura i kanë dhuruar Shqipërisë të qeshura dhe humor ndër vite. 4 dekada të jetës së tij i kaloi në teatrin e shquar “Migjeni” në qytetin e Shkodrës.
Gjatë homazheve, kanë shprehur keqardhje dhe trishtim disa nga aktorët e humorit.
Në një prononcim për mediat, Agron Llakaj thotë se ikja e artistit Zef Deda është një dhimbje e madhe.
“Të gjithë të Zotit jemi dhe një ditë do të largohemi, megjithatë, ikja e Zefit është e parakohshme. Artistët me emrin e Zefit janë të tillë që në momentin e parë të shkaktojnë dhimbjen, por ai me veprën dhe artin e tij ka lënë të qeshurën mbrapa, dashurinë e një publiku që e ka dashur dhe mbështetur gjatë gjithë kohës dhe mendoj se ndoshta duhet një punë për t’i rikthyer brezit të ri për të kuptuar se kush ka qenë arti i vërtetë dhe se çfarë do të thotë që të jesh një artist humori që edhe pse ka arritur t’i mbijetojë asaj kohe, në kuptimin tim vizual, më duket sikur trupa profesioniste e humorit shqiptrar më shumë është në qiell se sa në tokë, aty janë emra të mëdhenj dhe sot i bashkohet dhe Zef Deda, ndryshe e quanim “Çaplini shqiptar”. Unë shpresoj se dy djemtë e tij që janë artistë, Juli sidomos të jetë i zoti të trashëgojë diçka nga geni i Zefit. Dhimbja nuk është vetëm për publikun e Shkodrës, por besoj se për këdo që ka përcjellë artin e Zefit, është një dhimbje e madhe” tha Llakaj.
“Ka vdekur humori shqiptar për mua”, kështu është shprehur aktori i humorit Edmond Halili për ndarjen nga jeta të Mjeshtrit të Madh, Zef Deda.
“Unë e kam thënë edhe herë të tjera, ‘ka vdekur humori shqiptar’ për mua. Zef Deda ka qenë një mrekulli e humorit shqiptar. Është një humbje e madhe për qytetin e Shkodrës nuk diskutohet, por edhe për mbarë Shqipërinë, sepse Zef Deda nuk bën më nëna. Janë të rrallë aktorët si Zef Deda. Ishalla pas 15 vitesh po del ndonjë. Unë bëra atë shfaqjen që ju e dini ‘50 vjet në skenë’ dhe nuk kam pasur mundësi ato ditë, pasi kam qenë me prova, me gjëra dhe mbaroj shfaqja shkova në shtëpi dhe thashë të shpisë dua të iki sot, për dje. Dua të shkoj ta takoj Zefin me pi kafe sepse nuk e dija që ishte aq rëndë. Shkuam tek shtëpia dhe në kat të dytë doli një çun me çantë. I thash ‘hë mo, po ti’!? Jam infermier tha. Po ku ishe? Te Zefi. “Si është Zefi?” i thashë. Zefi tha ‘Mondi na la’. M’i ka këputur këmbët”, shprehet Halili./Opinion.al
