SPAL-i është skuadra e parë e Serisë B që siguron ngjitjen në Serinë A për sezonin e ardhshëm. Pas 49 vitesh pritje, skuadra e qytetit të Ferrarës është rikthyer mes më të mirëve të futbollit italian duke zhvilluar një sezon fantastik. SPAL-i u ngjit në Serinë B vetëm vitin e shkuar dhe askush nuk e priste një sukses kaq të madh të menjëhershëm.
Megjithatë edhe pse siguroi matematikisht ngjitjen në Serinë A, sot SPAL-i u mposht në transfertë nga Ternana me rezultatin 2-1.
Me këtë fitore Ternana doli nga zona e “play-out”, ku mbijetesa mbetet një çështje e hapur deri në “finalet” pas fundit të kampionatit të rregullt, por futi aty Avelinon e Berat Gjimshitit që u mposht në transfertë 2-0 nga Salernitana. Mbrojtësi shqiptar qëndroi në fushë për 90 minuta të plota dhe u ndëshkua me karton të verdhë në minutën e 82-të.
