Flamur Gashi, ish-ambasador i Shqipërisë në Bosnjë, aktualisht këshilltar i Presidentit Ilir Meta ka treguar historinë gati të pabesueshme në të cilën u përfshi aksidentalisht. Ai tha se një grua është mashtruar në rrjetet sociale, pasi është keqpërdorur fotografia e tij.
Gashi u shpreh për gazetën “Express” se “do të bisedoj me një avokat, mikun tim në Amerikë. Mbrëmë e kam marrë vesh. M’u duk pak absurde”.
Por më tej ai shtoi: “Më vjen mirë që është zbuluar kjo ngjarje dhe të mos ketë viktima të tjera”.
Lajmi u bë i ditur dje nga “Dailymail”, që shkruante se një grua e ve nga Orlando ka humbur të gjitha kursimet e jetës së saj, pasi u mashtrua nga një person i cili përdorte fotografinë e Flamur Gashit, vëllait të deputetit të LDK-së, Arben Gashit.
Siç shkruan “DailyMail”, 65 vjeçarja, Diane Standish nga ky mashtrim humbi plot 270 mijë dollarë. Ajo thotë se ajo ra në dashuri me njeriun që e njihte si Darnell ‘Jerry’ Michael pasi u takuan në platformën online match.com.
Por, fytyra me të cilën ajo ra në dashuri ishte e Flamur Gashit, ish-ambasador në Bosnje, i cili është i martuar, ka tre fëmijë dhe jeton në Shqipëri, ku ka pozitën e Këshilltarit të Presidentit.
Standish tha se nuk kishte rezerva kur Michael filloi ta pyeste për paratë, pak pasi filluan të flisnin.
“Unë kurrë nuk mendova se dikush mund të bjerë në dashuri me dikë në telefon”, thotë ajo. “Por për disa arsye, ai thoshte vetëm gjërat e duhura për mua”. “Unë kam biseduar me miliona njerëz të cilët thanë se u takuam në eHarmony dhe në ëëë.match.com dhe ata janë të lumtur të martuar, kështu që unë nuk kam ndonjë arsye për ta vënë këtë gjë në dyshim”. Standish tha se i dërgoi paratë Michaelit, sepse ai i tha asaj se do të shkonte në Orlando dhe të martohej me të.
