Kaloi 20 vite në burg për një vrasje që nuk e kishte kryer, derisa dikush tjetër e pranoi atë. Është kjo historia e një qytetari nga Korea e Jugut, i cili u fut në burg kur ishte vetëm 22 vjeç dhe doli prej tij 20 vite më pas, për një krim që nuk e kishte kryer.
Sipas CNN, mekaniku 22-vjeçar u akuzua për përdhunimin dhe vrasjen e një vajze 13-vjeçare, personi i tetë që vritej brenda dy vitesh.
Afërsisht një vit pas krimit, policia mbërriti në shtëpinë e Yoon dhe e shoqëruan në komisariat, ku në një dhomë të vogël e morën në pyetje për tri ditë me radhë.
Yoon i tha policisë se natën e vrasjes doli të merrte pak ajër. Gjatë shëtitjes, iu desh të ndalonte disa herë, sepse poliomieliti i kishte dëmtuar gjymtyrët. Gjatë mesnatës, Yoon pa një dritë ndezur në një shtëpi dhe sikurse rrëfeu, “ndjeu një nevojë urgjente për përdhunim”. Sipas transkripteve të rrëfimit, ai kapërceu dritaren dhe përdhunoi vajzën edhe pse e dinte që prindërit e saj po flinin në dhomën ngjitur. Pas kësaj, dogji rrobat dhe shkoi në shtëpi.
Historia e Yoon është e çuditshme: Ai rrëfeu krimin, u dënua me burgim të përjetshëm dhe u lirua 20 vite më pas, sepse Yoon nuk vrau dhe nuk përdhunoi kurrë njeri.
Në shtator të 2019-s, një nga zyrtarët e fundit të ngarkuar me hetimin e vrasjeve të shumta në Hëaseong, bëri një njoftim tronditës. Në korrik, policia dërgoi prova që mbaheshin në dosje prej 30 vitesh dhe testoi ADN-në. Provat e ADN-së treguan se tre nga vrasjet e famshme u kryen nga një person i identifikuar se Lee Chun-jae, i cilo rezultoi më pas që në fakt ishte autor i 10 vrasjeve, përfshirë edhe atë të vajzës 10-vjeçare.
Por çfarë ndodhi me Yoon dhe përse ai pranoi një krim që nuk e kishte kryer?
Kur merrej në pyetje nga policia, Yoon u la pa gjumë për plot 3 ditë. Qëndrimi zgjuar ishte një praktikë që përdorej shumë nga policia në Korenë e Jugut, me qëllim marrjen e rrëfimeve. Yoon nuk dinte asgjë për ligjin, nuk kishte mbaruar as filloren, ndaj për të shpëtuar nga dënimi me vdekje, i frikësuar, firmosi 3 letra ku deklaronte veten autor të vrasjes.
“Ishte një makth,” tha ai. “Kur nuk fle për tri ditë me radhë, ti nuk e di më se çfarë thua. Nuk mban mend asgjë. Nuk mendon me arsye. Pyet veten nëse e ke kryer krimin ose jo.” Në fund, Yoon firmosi dhe kreu 20 vite në burg, derisa vrasësi i vërtetë rrëfeu krimin./Opinion.al
