Sot më 15 Shtator një avion i vogël tip Piper ra në Ishëm të Durrësit, saktësisht pranë bregdetit të Gotullës (mes Laçit dhe Durrësit). Avioni ka rënë në orët e para të mëngjesit, por policia e ka gjetur rreth orës 08:45. Po sipas policisë, është marrë dëshmia e pilotit, italiani 69 vjeç Guido Andrea Guidi. Ai i ka thënë policisë se ishte duke udhëtuar nga Bari në drejtim të Veriut të Italisë, por befas e ka joshur koha e bukur dhe ka vendosur të bëj një xhiro mbi det. Sipas tij, avioni i ka dhënë defekt dhe është ulur në këtë vend, pa e ditur se ku ishte.
Tre vite më parë, më 10 Maj 2014 një avion ra në Divjakë. Ishte edhe atëherë një pilot italian, Giorgo Riformato, 56 vjeç i cili po ashtu kishte ardhur për turizëm në Shqipëri. Avioni i Riformatos, gjithashtu pësoi defekt. Por, 2 km më larg u gjetën 2 ton hashash që mendohej se do të ngarkohej në avion. Riformato nuk e ka pranuar asnjëherë akuzën e trafikimit të drogës, duke pretenduar se erdhi në Shqipëri për turizëm. Riformato u dënua pak muaj më parë nga gjykata shqiptare me 12 vite burg, por dënimin do ta kryejë në Itali.
Ngjashëmri tjetër mes këtyre dy rasteve është se avionët janë të të njëjtit model tip “Piper”. Sipas specialistëve që kanë analizuar rastin e Divjakës, këto mjete janë të përshtatshme për trasnport.
Të dyja rastet vijnë të denoncuara nga PD. Kujtojmë se në 2014, Sali Berisha akuzonte pareshtur Ramën për avionët me drogë që uleshin në Divjakë. Madje prej asaj kohe ka mbetur batuta “mushkonjat”, pasi Beqaj duke mohuar akuzat e Berishës, do të thoshte se janë avionët e shëndetësisë që dizenfektojnë mushkonjat në Divjakë. Rastësisht ose jo, historia përsëritet, sot Partia Demokratike akuzonte në parlament mazhorancën për drogën, kur Flamur Noka, u ngrihet dhe deklaron se: “një mushkonjë sapo ka rënë në Durrës”. Pra ishte i pari që e dha lajmin e avionit në Ishëm të Durrësit.
Por nëse në 2014 hashashi që do ngarkohej në avion u gjet 2 km larg, sot ende nuk është gjetur asgjë. Të gjitha dyshimet janë se ky avion nuk erdhi nga koha e bukur në Shqipëri por për tu ngarkuar me hashash. Gjithsesi do te presim hetimet e policisë e prokurorisë për këtë rast. /R.Dedaj-Opinion.al
