Kjo është padyshim historia që tregon se si vullneti dhe forca e brendshme nuk njohin pengesa.
Kujtimi ka lindur me shikim të reduktuar për shkak të retinës së zgjeruar, por kjo nuk e ka penguar të bëjë një jetë normale dhe të kërkojë më shumë nga vetja.
35 vjeçari ka arritur të shndërrohet në një fizioterapist profesionist, vetëm falë forcës së tij për t’ja dalë në jetë.
Ai ka lindur dhe është rritur në Përmet, ndërsa në vitin 1999 u transferua në Tiranë bashkë me familjen tij, ku ndoqi dy vitet e fundit të shkollës së mesme.
Në atë kohë Kujtimi thotë se shikonte, ndonëse në një përqindje të vogël, por që gjithsesi i kishte shërbyer për të mësuar të lexonte dhe të shkruante, të paktën deri në moshën 18-vjeçare, kur u verbua përfundimisht-shkruan e përditshmja “Shqip”.
“Me të përfunduar shkollën e mesme, edhe pse nuk shikoja dëshiroja të ndiqja studimet e larta. Ishte më e fortë se unë dëshira dhe vullneti për t’u integruar. Nuk doja që rrugëtimi që kisha nisur të mbetej përgjysmë. Kështu aplikova për të ndjekur studimet e larta në Universitetin e Tiranës, për Fizioterapi”, rrëfen Kujtimi.
Studimet e ciklit të parë i ka mbaruar shkëlqyeshëm, me mesatare 9.6, ku përveç diplomës merr edhe certifikatë si student i dalluar duke u shpallur 1 nga tre studentët më të mirë të atij viti.
Ai tregon se si i dedikohet të moshuarve që vuajnë nga probleme kardiovaskulare, hipertension ose nga probleme reumatizmale.
“Unë ofroj seanca fizioterapie, këshillim të përgjithshëm shëndetësor, matje dhe këshilla për tensionin arterial. Jam shumë i lumtur me punën që bëj, sepse u shërbej njerëzve në nevojë”, rrëfen gjithë gëzim Kujtimi, i cili është bashkëshort dhe baba i një vogëlushi 2 vjeç e gjysmë.
