Autori i një krimi të ndodhur 8 vjet më parë në fshatin Karpen të Kavajës është arrestuar dy ditë më parë nga Policia e Tiranës, raporton “Panorama”. Ai është Arjan Grami, 40 vjeç, i dënuar me 12 vjet burg nga Gjykata e Apelit për vrasjen e shokut të tij, Kastriot Godole, nga Vlora
Burime nga Policia thanë dje se Grami është arrestuar në afërsi të fshatit Ndroq, teksa po shkonte në shtëpi, pranë familjes së tij. Ngjarja për të cilën ai është shpallur fajtor dhe dënuar me 12 vjet heqje lirie ka ndodhur më 4 nëntor të vitit 2008 në një stan bagëtish, ku viktima dhe autori ishin punësuar si barinj prej dy muajsh. I dyshuari u arrestua 2 ditë pas ngjarjes, të cilën e denoncoi vetë në polici, duke e raportuar si vetëvrasje. Megjithatë, provat e tradhtuan pasi rezultoi se bariu nga Vlora ishte qëlluar me 7 plumba pistolete, e cila kishte gjurmët e shokut të tij. Megjithatë, pas disa zvarritjeve të gjyqeve, Arjan Grami u lirua me kusht nga Gjykata e Shkallës së Parë, pasi bëri disa vite burg. Por në vitin 2016, Gjykata e Apelit të Tiranës vendosi kthimin e tij në qeli, duke pranuar kërkesën e prokurorisë.
NGJARJA Më 4 nëntor të vitit 2008, gjatë një grindjeje të nisur në gjendje të dehur pas një loje bilardoje solli vrasjen e bariut nga Vlora, 26vjeçarit Kastriot Godole. Autori rezultoi të ishte shoku i tij nga Tirana, Arjan Grami, në atë kohë 34 vjeç. Pasi e qëlloi me 7 plumba pistolete, Grami fjeti me viktimën në stanin ku qëndronte bashkë me të, në fshatin Karpen të Kavajës. Të nesërmen ai lajmëron policinë, duke tentuar ta fshehë krimin dhe e denoncoi si vetëvrasje. Oficerëve të policisë kriminale të Kavajës iu desh vetëm një këqyrje e trupit, i cili ishte kishte shtatë plumba për të provuar se bëhej fjalë për vrasje dhe autori ishte pikërisht denoncuesi.
Ngjarja ndodhi më 4 nëntor të vitit 2008 dhe autori i arrestua dy ditë më vonë. Burime zyrtare nga Policia thanë në atë kohë se autori dhe viktima ishin punësuar si barinj në një stan dhe krimi ka ndodhur pas një sherri për motive të dobëta midis tyre. Ata ruanin bagëtitë e një fshatari dhe flinin në stanin e tij. Mbrëmjen kur ndodhi ngjarja, dy barinjtë pasi kanë mbyllur bagëtitë kanë shkuar në lokalin e fshatit ku kanë konsumuar një sasi alkooli dhe më pas bënë edhe një lojë bilardo. Burimet thanë se gjatë lojës ata kanë nisur të debatojnë dhe janë larguar nga aty, duke e vazhduar sherrin edhe në stanin ku flinin. Viktima, Kastriot Godole, ka tentuar të mbyllë sherrin dhe është shtrirë për të fjetur, por në këtë moment autori, Arjan Grami, ka marrë pistoletën që e mbante pa leje dhe ka qëlluar shtatë herë mbi trupin e bariut, duke i shkaktuar vdekjen e menjëhershme. Ai e ka mbuluar 26vjeçarin me një batanije, ndërsa i ka lënë edhe pistoletën në dorë. Më pas është shtrirë për të fjetur. Mëngjesin e ditës së nesërme, Grami nuk e ka lëvizur trupin e pa jetë të kolegut të tij, ndërsa vetë është larguar nga stani për të kullotur bagëtitë. Kur është kthyer në mbrëmje ka vendosur të lajmërojë policinë. Etleva Delia/Panorama.al
