E bindi që ta ndiqte të Itali me premtimin se i kishte gjetur punë dhe se do të krijonin një familje. Por shumë shpejt, e reja do të binte pre e dhunës dhe presionit për t’u prostituuar.
Bëhet fjalë për një ngjarje të rëndë të ndodhur në vendin fqinj, ku një shqiptar, rezident në provincën e Sienës, në Toskanë të Italisë, ka rënë në prangat e policisë për akuzën e pengmarrjes dhe dhunës.
I arrestuari është një 37 – vjeçar me inicialet L.B, i cili akuzohet se për të paktën 10 ditë me radhë, ka mbajtur të mbyllur në bodrumin e banesës së tij dhe ka dhunuar fizikisht dhe psikologjikisht, një 27 – vjeçare shqiptare, të cilën kërkonte ta detyronte që të prostituohej.
Sipas mediave italiane, 37 – vjeçari, prej vitesh rezident në Itali, u njoh me të renë disa muaj më parë teksa ndodhej në Shqipëri dhe i kërkoi asaj që ta ndiqte në Itali.
Ajo mbërriti në vendin fqinj për të nisur jetën e re më 20 Prill. Por me të mbërritur ai i mori dokumentat, paratë dhe telefonin celular, duke e mbyllur më pas në bodrum dhe duke e kërcënuar.
Qëllimet e tij ishin që ta detyronte të renë të prostituohej dhe për këtë ai ushtronte dhunë fizike të vazhdueshme.
Ajo pranoi dhe vazhdoi të vuante dhunën e 37 – vjeçarit duke refuzuar që të prostituonte, derisa ky i fundit gabimisht harroi telefonin në banesë. E reja mësohet se arriti të kontaktonte të motrën, e cila jetonte në Itali, duke i shpjeguar se gjendej e mbyllur në një banesë pranë Poggibonsi.
E motra njoftoi menjëherë karabinierët dhe pas disa orësh, falë një telefonate të marrë nga fqinjët, që u ankuan për ulërima dhe thirrje të një gruaje, arritën të gjenin banesën ku mbahej 27 – vjeçarja.
E reja u gjet në gjendje të rëndë dhe u transportua menjëherë në spital për të marrë kujdesin e nevojshëm mjekësor, ndërsa dhunuesi i saj është prangosur.
