Gjatë etapës së tretë të Tour Doën Under, ka një ndodhur një episod interesant, që ka përfshirë çiklistin amerikan Tyler Farrar, që garon me skuadrën Dimension Data. 20 km nga finishi, ai përfshihet në një aksident. Disa dëmtime të lehta dhe pasi merr “OK” edhe nga skuadra rinis garën. Por pas disa metrave kupton se biçikleta e tij nuk arrin të ndërrojë marshet. Makina e skuadrës është larguar dhe për një moment u duk se gara e Farrar mbaroi aty.
Por një tifoz neozelandez që ndodhej aty pranë, Anthony Tooman, ka parë gjithë ngjarjen dhe pyet çiklistin: “Ke nevojë për një rrotë?” “Sikur të ishte kaq e lehtë… më duhet e gjithë biçikleta”, përgjigjet Farrar. Dhe në ato momente, spektatori, një tifoz i garave të çiklizmit, i jep biçikletën e tij çiklistit amerikan, që ishte pak e shumë e ngjashme. Por pas disa metrash, Farrar kupton se nuk pedalon dot për shkak të këpucëve të ndryshme, ndaj ata ndërrojnë edhe këpucët, në mënyrë që amerikani të garojë. Dy protagonistët lënë takim për në finish, ku dhe takohen sërish.
“Në 14 vite karrierë kjo është hera e parë që më ndodh. Nuk më mbetet gjë tjetër veçse ta falënderoj, pasi më shpëtoi garën dhe turneun. Do të zhgënjehesha nëse do të garoja në Australi vetëm dy etapa e gjysmë”, tha Farrar, ndërkohë që edhe skuadra e tij Dimension Data falënderoi spektatorin për gjestin, që përfundoi në faqen e parë të mediave./ © telesport.al
