40 vjeçari Besim Lami është dërguar për gjykim në Gjykatën e Tiranës në akuzën e tentativës për përdhunim. Ai është arrestuar 3 muaj më parë, ndërsa tani kanë përfunduar hetimet.
Pronari i butikut akuzohet për kryerjen e veprës penale “Marrëdhënie seksuale me dhunë me të rritura” mbetur në tentativë dhe “Marrëdhënie seksuale duke shpërdoruar detyrën” mbetur në tentativë.
Në përfundim të hetimeve paraprake rezultoi se: “Vajza me iniciale K.Z e moshës 18 vjeçe ka filluar punë pranë një shoqërie e cila ka për objekt të saj tregtim veshmbathjesh dhe artikujve të ndryshëm. Ajo ka filluar punë në muajin janar 2017 fillimisht pa kontratë.
Ndërkohë i pandehuri nuk figuron i punësuar pranë kësaj shoqërie, por njihet “de facto” si bashkëpronar në kompaninë ku punonte e reja.
Më datën 22 Janar 2017 në mëngjes, 40 vjeçari ka shkuar dhe e ka marrë me furgon pranë banesës së saj 18 vjeçaren, pasi do të merrnin mall për ta shitur në Elbasan. Ata kanë lëvizur deri në Pogradec dhe më pas kanë lëvizur drej Tiranës.
Në afërsi të vendit të Mulletit, i pandehuri ka ndaluar furgonin, ka hapur krahun duke i thënë se do të pinte një cigare. Ai i ka ulur siguresat e dyerve dhe ka tentuar të kryejë marrëdhënie me të dëmtuarën jashtë vullnetit të saj. Ajo e ka kundërshtuar, e ka shtyrë dhe është shkëputur prej tij duke dalë në autostradë dhe i ka dalë para një automjeti. Makina e ka sjellë deri tek fakulteti Ekonomik ku ndodhej një patrullë policie së cilës i ka treguar se çfarë i kishte ndodhur. Ajo ka bërë kallëzimin penal dhe ankimin përkatës. Ajo ka dhënë deklarime ku tregon rrethanat e sipërcituara.
Nga këqyrja e bërë ka rezultuar se rrobat e saj kanë qenë me baltë dhe pjesa e kyçit të dorës së djathtë ka patur dërmishje po ashtu edhe në pjesën e gjurit të djathtë.
Me marrjen e njoftimit punonjësit e policisë kanë bërë të mundur gjetjen e personit nën hetim dhe nga këqyrja e bërë ka rezultuar se edhe ai ka patur rroba me mbetje balte.
Nga akti i ekspertimit kompjuterik rezulton se e dëmtuara gjatë komunikimeve të bëra me facebook me financieren, ata flasin në lidhje me gjendjen e mallit, për dhënien e faturave dhe për mënyrën që se si ka orientuar pronari i firmës për punën. Pra si i pandehuri ashtu edhe e dëmtuara ka punuar për llogari të shoqërisë.
I pandehuri mohon faktin e kryerjes së veprës penale”, thuhet në dosjen e prokurorisë.
