TIRANE- Marrëdhëniet vjehrre-nuse vazhdojnë të mbeten të komplikuara. Dihet që në shumicen e rasteve nuk shkojnë mirë, por ka edhe nga ato raste sherri degjeneron në dhunë.
Një e moshuar rrëfen me detaje se si është rrahur nga nusja e djalit. Tani nusja, nënë e dy vajzave të mitura, mbahet e arrestuar në polici, ndërsa vjehrra thotë se edhe mund ta falë për hir të vajzave (mbesave).
Ja historia e rrëfuer prej Drita L. Banuese në rrugën Jorsan Misja në Tiranë
Zonja Drita, nusja e djalit tuaj është arrestuar 3 ditë më parë nga policia e Tiranës, pasi ju e keni denoncuar për dhunë në familje. Si qëndron e vërteta?
Po, unë vetë kam bërë denoncim në polici ndaj nuses së djalit tim. Kjo nuk është hera që parë që e kam denoncuar. Unë kam qenë me urdhër mbrojtjeje edhe herën e fundit që nusja më ka dhunuar. Më ka dhunuar vazhdimisht. Ka rreth 10 vite që më rreh. Që kur ka hyrë nuse në shtëpi, ka vënë dorë mbi mua.
Ju, me kë jetoni në banesë?
Unë jetoj së bashku me djalin tim, nusen e tij dhe dy mbesat e vogla, njëra është 9 vjeçe ndërsa tjetra 2 vjeçe. Një farë kohe ata u larguan për të jetuar me qira dhe më pas u bashkuam sërish në të njëjtën shtëpi, por situata vazhdon të jetë po e njëjta.
Keni pasur konflikte me njëratjetrën dhe, sipas jush, cila është arsyeja që nusja ju dhunon?
Jo, nuk kemi pasur konflikte dhe nuk e di as vetë përse më dhunon. Më qëllon për arsye të kota që i di vetëm ajo. Edhe disa vite më parë, kur i ndjeri bashkëshorti im ishte gjallë, ajo ka ushtruar dhunë edhe mbi të. Kam denoncuar edhe më parë në polici. Denoncimin e kam bërë së bashku me bashkëshortin.
Ajo zihet pa asnjë shkak me mua, si i thonë një fjale, zihet edhe për një “fije peri”.
Ju pohuat se keni bërë denoncim edhe më parë në polici. Keni pasur urdhër mbrojtjeje?
Po, para se të më dhunonte herën e fundit, unë kam qenë me urdhër mbrojtjeje. Nusja më nxori përjashta në mes të natës, ashtu me rroba siç isha. Akoma e kam këmbën të nxirë nga të rrahurat e saj. Edhe fytin e kam akoma të nxirë, pasi edhe kur isha në polici më ka kapur për fyti. Në shtëpi më qëllonte me çfarë t’i kapte dora.
Po djali juaj, ju ka mbështetur në momentin që bashkëshortja e tij ju ka dhunuar?
Djali ka rënë në hall për vete, pasi nuk di kujt t’ia prishi e kujt t’ia ndreqi. Besoj se ai e kupton edhe vetë që nusja e tij është pak agresive, pasi nuk është e arsyeshme që të dhunosh një plakë e ta nxjerrësh atë përjashta bashkë me rroba.
Si reaguat në momentin kur policia vuri në pranga nusen tuaj?
Pavarësisht këtyre që kanë ndodhur, unë si nënë që jam, sapo policia erdhi në shtëpi dhe e arrestoi, shkova sërish në komisariat dhe e tërhoqa denoncimin që kisha bërë. Nuk doja që ajo të arrestohej, por në polici shkova thjesht që të mbrohesha prej saj. Ajo ka dy fëmijë të vegjël dhe nuk ua dua të keqen. Unë kërkoj vetëm një mbrojtje që ajo të mos më dhunojë më asnjëherë.
Nëse nusja juaj lihet e lirë, mendoni se kjo lloj situate mund të përsëritet dhe ju mund të bini sërish pre e dhunës?
Frikë kam shume se ajo është agresive, por nëse nuk vë më dorë mbi mua ia fal, se jam vetë nënë. Intervista është dhënë për ‘Gazeta Shqiptare’
