Premtimi i një pune të mirë në Itali dhe shpresa për të gjetur një njeri që e donte, ka bërë që një shqiptare e re, vetëm 27 vjeçe të bjerë në një kurth të tmerrshëm. Për ditë të tëra ka qenë e mbyllur në një shtëpi dhe e detyruar të vuajë dhunën e të gjitha llojeve, raportojnë mediat italiane.
Policia e ka shpëtuar vajzën pas 10 ditësh mbajtur e izoluar, dhunuar dhe poshtëruar.
Shqiptari me inicialet L. B., i moshës 37 vjeçare është arrestuar nga karabinierët italianë, me akuzën e rrëmbimit dhe lëndimeve fizike, raporton panorama.
Historia e trishtuar nisi disa muaj më parë, kur shqiptari rezident në Itali dhe punëtor ndërtimi atje prej disa vitesh, u kthye në Shqipëri me familjen dhe bindi vajzën të shkonte në Itali që të jetonin së bashku për të filluar një marrëdhënie të qëndrueshme.
Ajo mbërriti në Itali më 20 prill dhe shqiptari e çoi 27-vjeçaren në një banesë në Staggia, fasht i Poggibonsi-t. Nuk kishte kohë për të humbur, burri i mori vazës dokumentet, paratë dhe celularin dhe e mbylli në bodrumin e banesës.
Nën kërcënimin e dhunës e ka detyruar të punojë si prostitutë, por e reja nuk ka pranuar.
Në një moment që ka gjetur mundësinë, vajza përmes telefonit të 37-vjeçarit, i ka telefonuar të motrës që jetonte në Grosseto të Italisë, duke i shpjeguar se çfarë po përjetonte. Ka qenë kjo e fundit që më pas ka lajmëruar policinë.
Fillimisht efektivët nuk kanë mundur të gjejnë vendndodhjen e saktë të banesës ku mbahej vajza, por falë denoncimit të një fqinji, që tha se dëgjonte britma nga një banesë aty pranë, mundësoi zbulimin e vendit ku mbahej vajza dhe arrestimin e shqiptarit.
