Shqiptarja e Kosovës, Blerta Hoti është zgjedhur kryetare e komunës së Gotenborgut në Suedi.
Blerta ka qenë më parë azilkërkuese në shtetin suedez ndërsa tani, në moshën 33-vjeçare, ajo ka marrë drejtimin e komunës së dytë më të madhe.
Lajmin e bëri të ditur Ministri i Punëve të Jashtme të Kosovës, Behgjet Pacolli.
“Dikur azilkërkuese në Suedi, sot e emëruar në një post drejtues pikërisht në Suedi. Blerta Hoti merr timonin e komunës së dytë më të madhe në Suedi, Göteborg. Urime Blerta!” shkruan Pacolli.
Hoti është pjesë e partisë Social Demokrate në Suedi. Ajo shkruan në Facebook se do të përqendrohet në rishpërndarjen më të drejtë të të ardhurave. “Nga rritja ekonomike duhet të përfitojmë të gjithë” shkruan ajo. Pika e dytë më e rëndësishme në agjendën e saj është ndryshimi klimatik, sfidë të cilën kërkon ta shohë me prioritet.
Blerta është këshilltare politike në Parlamentin Europian prej 2015. Ajo i bashkohet Alba Kokalarit si dy shembuj suksesi me origjinë shqiptare në Suedi. /Opinion.al
