Një operacion i vështirë dhe i rrallë është realizuar me sukses në pavionin e Mjekësisë Interne në QSUT.
Një paciente 35-vjeçare i është nënshtruar ndërhyrjes për të hequr tumorin 7 cm të mbiveshkores së majtë, duke i dhënë fund një kalvari të gjatë vuajtjesh.
Lajmin e ka bërë publik Kryeministri Edi Rama përmes një postimi në rrjete sociale, i cili ka përgëzuar stafin mjekësor për realizimin e ndërhyrjes me sukses.
“Histori suksesi! Pas një kalvari të gjatë vuajtjesh, një vajzë e re 35-vjeçare, ka dalë me sukses nga një ndërhyrje e rrallë, falë koordinimit të shkëlqyer të ekipeve mjekësore për diagnostikimin, trajtimin dhe operacionin e shkallës së lartë të vështirësisë.
Pasi u diagnostikua me një tumor 7 cm të mbiveshkores së majtë, 35 vjeçarja u përgatit në pavionin ultramodern të Mjekësisë Interne në mënyrë që të stabilizohej, dhe më pas, ekipi multidisiplinar i mjekëve realizoi ndërhyrjen, e cila rezultoi me sukses.
Punë e shkëlqyer e Prof. Arben Gjata, Prof. Krenar Lila, Prof. Mihal Tase, Prof. Margarita Gjata, Dr.Dritan Reovica, Dr.Ardit Kaçani, Dr. Pranvera Shkëmbi dhe infermieret: Manada Cani, Mirjana Mema, Aida Hajro, Albana Qefalia”
Mjekët tregojnë se ndërhyrja dhe rikuperimi pas operacionit shkuan shumë mirë.
“Operacioni shkoi me sukses, tensioni është stabilizuar. Vajza nuk do ketë më probleme me tensionin që ishte shkak i kësaj sëmundje”, tha profesor Arben Gjata, Shefi i Shërbimit të Kirurgjisë Digjestive të QSUT.
“Pas operacionit ishte mirë, e sëmura kaloi pa komplikacione, ne ndërhymë për të shmangur komplikacionin më të vogël se do e rëndonte shumë, do të vazhdojë trajtimin për patologjitë e tjera”, shtoi Krenar Lilaj, Shef i Shërbimit Anastezi-Reanimacion, QSUT./Opinion.al
