Një tifoz symprehtë noti mund t’i ketë shpëtuar jetën kampionit olimpik Mak Horton, pasi pikasi një nishan të rrezikshëm në gjoksin e 20-vjeçarit.
Australiani, fitues i medaljes së artë në 400 metra stil i lirë në Olimpiadën e Rios, të premten postoi në “Instagram” një foto ku shfaqej pasi e kishte hequr nishanin me operacion në Melburn.
Ai pranoi se iu nënshtrua ndërhyrjes vetëm pasi një tifoz i dërgoi një e-mail ekipit australian të notit në Lojërat Olimpike, për ta vënë në dijeni të rrezikut. “Bravo i qoftë personit që i dërgoi e-mail mjekut të ekipit të notit e që më këshilloi mua të bëj një kontroll. Këshillë e mirë. Këshillë shumë e mirë”, shkruan Horton në mesazhin përkrah fotos, ku sportisti duket me gjoksin e fashuar.
Nga fotot e bëra përgjatë disa viteve të fundit vihet re se nishani në lëkurën e notarit është zmadhuar dhe ka marrë ngjyrë më të errët.
Australia është një ndër vendet më të prekura në botë nga kanceri i lëkurës, me rreth 2000 persona që vdesin çdo vit për këtë shkak. Sipas statistikave, rreth 66 për qind e popullsisë diagnostikohet me këtë sëmundje para moshës 70-vjeçare. Shkaku kryesor është rrezatimi ultravjollcë nga rrezet e diellit. Sipas Këshillit Australian të Kancerit, melanoma është forma më vdekjeprurëse e kancerit të lëkurës dhe nëse nuk kurohet, mund të përhapet në pjesë të tjera të trupit.
