Këtë javë presidenti i Serbisë, Aleksandër Vuçiç deklaroi se vendi i tij ka kompletuar blerjen e sistemit raketor nga Rusia.
Këtij fakti i janë përgjigjur Shtetet e Bashkuara të Amerikës të cilat shprehen të shqetësuara.
Në një reagim të ambasadës së SHBA në Beograd, i bëhet thirrje qeverisë serbe t’i ndërpresë transaksionet me Moskën pasi në të kundërt mund të ketë sanksione.
“U bëjmë thirrje të gjithë aleatëve dhe partnerëve tanë që të heqin dorë nga transaksionet me Rusinë“, të cilat, me ligjin amerikan, rrezikojnë vendosjen e sanksioneve, thuhet në reagimin e ambasadës amerikane në Beograd.
Aty nënvizohet gjithashtu se Rusia nuk e mbështet integrimin e Ballkanit Perëndimor në BE dhe kjo gjë shkon në kundërshtim të vizionit të SHBA.
“Moska, në mënyrë aktive, e kundërshton integrimin perëndimor të rajonit dhe përpiqet të pengojë zgjidhjen e tensioneve ndëretnike, të margjinalizojë ndikimin e SHBA-së dhe të Bashkimit Evropian dhe t’i pengojë vendet e Ballkanit Perëndimor të ndjekin orientimin e tyre të pavarur“, tha Ambasada e SHBA-së në Beograd.
Presidenti serb Vuçiç është shprehur gjithmonë pro integrimit të Serbisë në BE por ai ka treguar se në të njëjtën kohë mund të mbajë lidhje të ngushta me Rusinë dhe madje të blejë edhe armë nga ajo. Kjo është një nga kritikat më të mëdha që ka marrë politika integruese e Bashkimit Europian e cila megjithëse është investuesi i më i madh në Serbi nuk ka mundur të frenojë orientimin pro-rus të qeverisë serbe. /Opinion.al
