Hillary Clinton ka mbajtur fjalimin më të dhimbshëm të karrierës së saj politike pas humbjes në garën presidenciale përballë Donald Trump. Clinton, e cila shpresonte që të zgjidhej e para president femër, bëri daljen e saj të parë publike në New York, pas rezultatit që ka shkaktuar reagim në të gjithë botën.
“Mbrëmë urova Trump dhe u ofrova që të punoja me të për vendin. Më vjen keq që nuk i fituam këto zgjedhje për vlerat që përfaqësojmë. E di sa të zhgënjyer jeni, sepse kështu ndihme edhe unë. Por, fushata jonë nuk ishte për këto zgjedhje, por për vendin tonë. Vendi është më i ndarë se sa ne e mendojmë. Por ne do të luftojmë për Amerikën. Donald Trump do të jetë president ynë dhe ne kemi një kalim pushteti paqësor, që jo vetëm e respektojmë por e festojmë një gjë të tillë”, tha Clinton.
Hillary Clinton ka shprehur falënderim për bashkëpunëtorët e saj, Presidenti Barack Obama dhe Michael Obama si dhe familjarët e saj që i qëndruan afër gjatë fushatës elektorale.
Me një fjalim prekës, ku Clinton mezi i mbajti lotët, tha se nuk do të jetë e largët dita kur SHBA-të do të kenë një ditë një femër presidente.
“Kam pasur suksese, por edhe hapa pas. Kjo është e dhimbshme dhe do të jetë për shumë gjatë. Por, dua që të kujtoni këtë. Fushata jonë nuk ishte kurrë për një person, ishte për të ndërtuar vendin që duam. Ne pamë se vendi ynë ishte më i përçarë se sa e mendonim. Por dua t’u kujtoj se nuk duhet të ndaloni kurrë së besuari për gjëra që ëndërroni dhe që mendoni se ia vlejnë. Edhe diçka për femrat që besuan te kjo garë. Asgjë nuk më ka bërë më krenare sa sa të jem kampionia e juaj. Në fund diçka për të gjithe vajzat e vogla qe po ndjekin kete, mos e vini kurre ne dyshim vlefshmerine tuaj dhe se meritoni te keni cdo mundesi per te realizuar enderat tuaja. Jam krenare që pata shansin e madh t’u përfaqësoj juve në këto zgjedhje. Zoti ju bekoftë. Zoti bekoftë amerikën.”
Për Donald Trump: “Shpresoj se ai do të jetë presidenti i të gjithë vendit tonë. Ne duhet ta pranojmë këtë rezultat, Donald Trump do të jetë Presidenti ynë… i detyrohemi të jemi mendje hapur dhe t’i japin shansin që të drejtojë”, tha Clinton.
Ish-Sekretarja Amerikane e Shtetit do të kujtohet për dështimin e saj për të motivuar të gjithë votuesit Demokratë dhe për humbjen në shtete që tradicionalisht kanë votuar për demokratët si Pensilvania dhe Viskonsin.
16 vite pasi la Shtëpinë e Bardhe, Clinton i dha fund ëndrrës së saj të gjatë për t’u bërë presidente e SHBA-ve. Por, kjo nuk është hera e parë që Clinton provon shijen e humbjes në një fushatë presidenciale. Në vitin 2008, ajo u mund në garën brenda partisë nga Barack Obama.
