Pamjet e goditjes së makinës së policisë me një Audi të blinduar në Shtator në vitit 2017, publikuar në emision “Opinion” ishin shokuese. Ngjarja ndodhi në portën e tregut ushqimor të këtij qyteti, pronë e biznesmenit Petrit Cela. Emri i të birit, Suel Cela si person që kreu atentatin ndaj policisë u përmend nga opozita, por asnjëherë nga institucionet ligjzbatuese (policia, prokuroria).
Tashmë raportohen zhvillime të reja nga kjo ngjarje. Gjykata e Krimeve të Rënda ka vendosur “arrest me burg” në mungese për Suel Çelën, raporton Top Channel. Ai akuzohet për veprën penale të “vrasjes së oficerëve të policise të mbetur në tentativë”, para tregut agro-ushqimor të këtij qyteti. (shih videon).
Por me gjithë këtë vendim të Krimeve të Rënda, arrestimi i Suel Çelës deri më tani ka dështuar!
Sipas prokurorisë, masa arrest me burg është vendosur pasi dyshohet se Çela ka qenë në drejtimin e Audit të blinduar që goditi policinë. Burimet që citon Top Channel thonë se “provat e gjetura rrëzojnë alibinë e të arrestuarit Enea Bekteshi, i cili ka deklaruar se po e drejtonte ai mjetin”.
Suel Çela qëndroi në kërkim policor për më shumë se një muaj pas ngjarjes, ndërsa me dosjen e incidentit të Elbasanit luhej ping pong kompetencash sa në Prokurorinë e Elbasanit sa tek Krimet e Rënda.
Mësohet se policia e ka shoqëruar në muajin dhjetor 2017 Suel Çelën, por në atë kohë i kishin përfunduar afati e kërkimit policor. Në këto kushte ai është lënë i lirë nga policia, raporton TCH.
Pas kësaj në referim të provave të prokurorisë, Gjykata e Krimeve të Rënda ka shpallur masën e sigurisë arrest me burg për të. Por kjo masë arresti është vendosur një javë pasi Suel Çela (siç rezulton nga sistemi TIMS), kishte dalë nga Shqipëria, i lirë dhe i patrazuar nga drejtësia….
