TIRANË – Një paralelizëm qe ngjall reagime, por që pas ironisë së përdorur mund të fshihet një skandal. Edhe pse shefit të tij në Qeveri, nuk do t’i ketë pëlqyer shumë statusi i fundit i drejtorit të ALUIZNI-t në Facebook, për më tepër kur atakohet një vend mik si Turqia të cilin Rama e ka shpallur aleat strategjik.
Ironia me kontekst historik që ka përdorur Artan Lame vjen nëpërmjet një fotoje ku në sfond duket flamuri kuvajtian dhe paralel me të monumenti “Nënë Shqipëri” i vendosur në Varrezat e Dëshmorëve në kodrat e Saukut, simbol i lirise. Por ajo që të befason është fakti se flamuri ndodhet në një territor të gjelbëruar, që duket të jetë pjesë e parkut të Varrezave të Dëshmorëve, por që mbetet për tu verifikuar.
Ja cfarë shkruan Artan Lame në Facebook:
“U desh të binin shumë shehitë (dëshmorë) dhe nja 600 vjet rrugë, por më në fund e bitisëm andej nga e nisëm, nga Lindja. Flamuri kuvajtian në parkun poshtë Varrezave të Deshmoreve. Në anën tjetër të gardhit ka blerë Katarri (në mos gabohem) dhe nja 100 metra më tej Turqia. Do të ndërtojnë ambasadat e tyre aty. A.”,- shkruan Lame ndërsa ironizon “pushtimin” e parkut poshtë monumentit nga ato që ai i quan ambasada të orientit.
Po përtej ironisë që Lame ka përdorur, kjo foto mund të fshehë edhe një skandal që mbetet për t’u vertetuar. Nëse prona ku ambasada e Kuvajtit po ndërton është pjesë e parkut të Varrezave të Dëshmorëve apo jo? Nëse Po atëherë ky do të ishte një skandal i pashoq për të cilin duhen gjetur edhe fajtorët.
