Koreja e Veriut ka hedhur në erë zyrën kufitare që përdorej për bisedime me Jugun. Kjo tregon se tensionet në gadishullin Korean janë përshkallëzuar dhe marrëdhëniet mes dyja vendeve, të cilat praktikisht janë ende në luftë, mund të ndërpriten.
Media shtetërore e Koresë së Veriut raportoi se ndërtesa, që gjendet në qytetin Kaesong në pjesën e shtetit komunist të zonës së demilitarizuar ku ndahen dy Koretë, u shkatërrua plotësisht nga një shpërthim i fuqishëm.
Godina ishte hapur në vitin 2018 dhe kishte për qëllim të lehtësonte komunikimin mes dy koreve ndaj shkatërrimi i saj ishte më shumë simbolik për të shënuar një pikë kthese në marrëdhëniet mes palëve.
“Akti i fundit i pamatur ka lënduar dinjitetin e lidershipit tonë suprem. Bota do ta shohë qartë dënimin e ashpër që populli ynë do t’i bëjë autoriteteve të Koresë së Jugut dhe se si zhduket e keqja e njerëzimit nga faqja e tokës”, raportoi media shtetërore e Koresë së Veriut.
Koretë ndërprenë pasi disa fletushka me mesazhe kritikuese për liderin Kim Jong-un lidhur me shkeljet e të drejtave të njeriut, dërgoheshin në territorin koreanoverior nga ata që kishin dezertuar vendin.
Për të frenuar këtë fushatë, ushtria e regjimit komunist u shpreh e gatshme të veprojë kundër grupeve të dezertorëve, madje, një ushtarak i lartë tha se po studionte një plan për të rifutur ushtrinë në zonën e demilitarizuar, për ta kthyer atë në një fortesë./Opinion.al
