Pas tërmetit tragjik të 26 nëntorit, Prokuroria e Durrësit ka konstatuar shkelje të rregullave të sigurisë teknike në godinat e shembura nga lëkundjet.
Prokuroria ka marrë mostra të hekurit e betonit si dhe janë kryer filmime e fotografime të konstruksionit të ndërtesave të dëmtuara që shkaktuan viktima.
Sipas saj, analizat laboratorike kanë nxjerrë në pah faktin se betoni i përdorur nga ndërtuesit ka qenë disa herë më i dobët se cilësia e duhur lidhur me rezistencën.
Gjatë verifikimeve, është konstatuar se kolonat mbajtëse të godinave nuk kanë pasur dimensionet dhe sasinë e duhur të hekurit, gjë e cila ka bërë që lëkundjet e tërmetit të shkatërronin këto banesa.
Konstatimet janë pjesë e rëndësishme e hetimit dhe pritet që tani të zgjerojë numrin e personave nën hetim duke mos përjashtuar edhe arrestime të tjera, përveç 11 shtetasve të vendosur në pranga deri më tani.
Gjithashtu, Prokuroria e Durrësit ka kërkuar studimet e Institutit të Gjeoshkencave për zonën e Durrësit për zonat që janë përcaktuar si me lëkundje dhe sa është zbatuar ky studimin në lejet e ndërtimit që është dhënë për pallatet e dëmtuara.
Po ashtu, lidhur me dëmet e krijuara nga tërmeti i 26 nëntorit, po merren në pyetje zyrtarë të Bashkisë së Durrësit, të cilët do të japin shpjegimin e tyre për dokumentacionin dhe procedurat që janë ndjekur nga punonjësit e këtij institucioni./ Opinion.al
