Kryebashkiaku në detyrë i Himarës, që prej ditës së djeshme, atëherë kur SPAK lëshoi urdhër-arrestet është transferuar në bllokun e sigurisë, ku brenda 48 orësh do dalë para Gjykatës së Posaçme ku do t’i komunikohet masa dhe dyshimet mbi dy rastet të cilat SPAK ka verifikuar se ai ka shpërdoruar detyrën e tij.
Sipas tvklan mësohet se njohje të masës do të bëjnë edhe ish-zyrtarët e tjerë të cilët janë në arrest shtëpie, Bilbil Aliaj dhe Vezir Gjikoka.
Sipas SPAK, ata kanë konsumuar veprën penale të shpërdorimit të detyrës në lidhje me dy raste atë të tjetërsimit të pronave për zhvendosjen e një sipërfaqe mbi 5500 metra katrorë në një pronë shtet dhe për regjistrimin e një prone që është regjistruar në ASHK-në e Vlorës me dokumente të falsifikuara.
Kjo çështje vijon të jetë në hetim për sa kohë dy personat e vënë nën akuzë nga SPAK nuk janë vënë në pranga. Më konkretisht bëhet fjalë për Jerasimo Bashon ish-zyrtar i bashkisë që ka mbajtur postin e Drejtorit të Mbrojtjes dhe Menaxhimit të Tokës në Bashkinë e Himarës.
Është në kërkim edhe Stavri Mëhilli që SPAK ka kërkuar masën e sigurisë arrest me burg, por që ky person nuk është gjetur nga policia. Ky person sipas SPAK është personi që ka përfituar pronën e tjetërsuar nga manovrat e kryera.
