Më herët qarkulloi në media një lajm ku thuhej se prokuroria e Durrësit ka sekuestruar dosjet e banesave të shkatërruar nga tërmeti i 26 nëntorit, të cilat ishin ndërtuar 10 vitet e fundit.
Përmes këtyre dosjeve do të verifikohej ligjshmëria e banesës si dhe i gjithë zinxhiri ligjor apo teknik i ndërtimit të objektit, gjë e cila do të zbulonte dhe personat të cilët kanë dhënë leje për ndërtimin e tyre.
Por, ky lajm është përgënjeshtruar. Në një reagim të Prokurorisë së Durrësit, thuhet se dosjet nuk janë sekuestruar, ndërsa shton se grupi hetimor po bën verifikimet përkatëse që parashikohen në Kodin Penal.
Sipas Prokurorisë, grupi hetimor do të kryej fillimisht hetimet në vendin e ngjarjes pastaj kontrollin e dokumentacionit.
Reagimi
Lidhur me rastin në fjalë grupi i hetimit të çështjes po kryen veprimet hetimore përkatëse siç parashikon K.Pr.Penale dhe një ndër to është dhe kqyrja në vend ku janë konstatuar prishje dhe dëmtime të objekteve. Sipas parashikimeve ligjore kqyrjet janë shoqëruar dhe me fotografi dhe marrjen e provave të domosdoshme në vendngjarje për verifikimet e duhura që do të bëhen më pas.
Duke parë rrezikshmërinë që paraqesin objektet e dëmtuara dhe shpejtësinë që duhet për evitimin e pasojave të tjera nuk mund të bëhet sekuestrimi i këtyre objekteve, por është çmuar që pas kryerjes së veprimeve proceduriale në vendngjarje, ata (grupi hetimor), të jenë të lirë për të vendosur për vijimësinë e objektit nga instancat përkatëse sipas çdo rasti. Njëkohësisht vazhdojnë dhe sekuestrimi i dokumentacionit përkatës për këto objekte në zyrat që i administrojnë ato./ Opinion.al
