Pistoleta e cila u gjet pranë vendit ku u vra 25-vjeçari Klodian Rasha nga efektivi i policisë vijon të mbajë peng hetimet.
Pas verifikimeve të gjurmëve të gishtërinjve rezulton se kjo armë nuk i përket as viktimës as efektivit të shqiponjave.
Ndërkohë, hetuesit janë në pritje të përgjigjes së disa gjurmëve biologjike të gjetura në të për të parë më pas se e kujt është kjo armë.
Një tjetër element që ka vështirësuar hetimet është edhe mungesa e kamerave të sigurisë në vendin ku ajo u gjet. Sakaq prokuroria ka rindërtuar dinamikën e vrasjes së Klodian Rashës, që nga ndjekja dhe deri tek momenti kur u qëllua.
Në vendngjarje janë gjetur dy gëzhoja, një prej plumbave ka prekur në garazhin e rrugicës ku u qëllua i riu dhe tjetri në trupin e viktimës.
Të dy plumbat janë qëlluar në një lartësi nga 120 deri 150 centimetra dhe kjo për hetuesit shpjegon faktin se efektivi Nevaldo Hajdaraj ka qëlluar në pjesët e sipërme të trupit dhe jo në gjymtyrët e poshtëm.
Për këtë pritet që akuza ndaj tij të rëndohet nga vrasje në kapërcim të kufijve të mbrojtjes së nevojshme në vrasje me dashje.
Vrasja e Klodian Rashës shkaktoi protesta disa ditore të cilat sollën dhe dorëheqjne e Sandër Lledhajt nga posti i ministrit të Brendshëm./ Opinion.al
