Javën e kaluar, Prokuroria njoftoi se do të zgjaste edhe me tre muaj hetimet ndaj ish-kryeprokurorit Adriatik Llalla. Ky i fundit e ankimoi vendimin, gjë që është hedhur sot poshtë nga Gjykata e Shkallës së Parë për Krimet e Rënda. Kështu, hetimet e prokurorisë për Llallën do të vazhdojnë edhe tre muaj të tjerë, përpara se dosja të shkojë për gjykim.
Prej vitit të kaluar Adriatik Llalla është nën hetim nga Prokuroria për pastrim parash, fshehje të pasurisë shpërdorim detyre dhe mosdeklarim të parave në kufi. Pronat e Llallës janë venë në sekuestro preventive prej 23 korrikut 2018 dhe llogariten në një vlerë prej afro 1 miliardë lekësh.
Llalla, i cili nuk mund të udhëtojë në Shtetet e Bashkuara të Amerikës, ka punësuar dy lobistë nga Nju Jorku për të kundërshtuar vendimin e Departamentit të Shtetit që e shpalli “persona non-grata”. Adriatik Llalla u shpall i padëshiruar nga Departamenti i Shtetit një vit më parë, me motivacionin e përfshirjes domethënëse në korrupsion./Opinion.al
