Ndërsa e gjithë bota është e prekur nga aksidenti fatal, autoritetet amerikane po hetojnë për të përcaktuar shkakun e rrëzimit të helikopterit, që çoi në vdekjen e yllit të basketbollit, Kobe Bryant, vajzës së tij 13-vjeçare, Gianna, dhe 7 personave të tjerë.
Hetuesit e Administratës Federale të Aviacionit si dhe ata të Bordit Kombëtar të Sigurisë së Transportit pritet të përqendrohen në kushtet e motit dhe defektet e mundshme mekanike.
Helikopteri Sikorsky S-76 u përplas të dielën në Calabasas, në Kaliforni në një kodër afro 500 metër të lartë, teksa udhëtonte me shpejtësi 300 km/h dhe po zbriste me mbi 1200 metër në minutë.
Autoritetet lokale në Kaliforni dhanë disa detaje rreth rënies së tij, duke theksuar se shikueshmëria ishte shumë e ulët dhe sipas tyre mjegulla e dendur ka bërë që piloti të mos ishte i vetëdijshëm rreth rrezikut që u kanosej. Këtë e konfirmon edhe biseda e fundit në radio me kullën e kontrollit, ku vetëm pak çaste përpara se helikopteri të zhdukej nga radarët, operatori e paralajmëronte pilotin se po fluturonte në kuotë shumë të ulët.
Ndërkaq raporti paraprak për shkaqet e aksidentit pritet të publikohet për pak ditë, ndërsa për raportin me detajet e plota mund të nevojitet deri në një vit.
Bryant, 41 vjeç, ishte padiskutim një nga lojtarët më të mirë të gjitha kohërave duke fituar 5 herë (2000–2002, 2009, 2010) titullin kampion në NBA dhe duke u shpallur 2 herë MVP në finale dhe një herë për sezonin. /Opinion.al
