Kryeministri Edi Rama i është përgjigjur kreut të SPAK, Arben Kraja, pasi ky i fundit tha se hetimet nuk nisen me deklarata pol me kallëzime.
Ai u pyet nga gazetarët se pse nuk i drejtohet SPAK-ut me kallëzime konkrete, por kryeministri u përgjigj duke thënë se partitë politike nuk mund të bëjnë kallëzime.
Rama tha se çfarë kallëzimi duhet të bëjë për rastin e një gjyqtareje që ka bllokuar nisjen e punimeve për ngritjen e qendrës kombëtare të fëmijëve te ish Garda e Republikës.
“Çfarë kërkon Arben Kraja nga unë sot kur këtë gjykatëse e ka në listë këtu me 462 mijë euro të pajustifikuara dhe me një akt haptazi të paligjshëm atje. Çfarë kallëzimi kërkon nga unë? Kam shumë respekt për Arben Krajën, drejtuesin e SPAK dhe kam respekt për punën që ka bërë deri tani. Kam respekt për goditjet që ka bërë në oborrin e PS-së dhe goditjet ndaj krimit të organizuar. Të bëjmë ne kallëzim për non-gratën? Ka dalë një akuzë që ëhstë më e rëndë se akuza e çdo gjykate dhe është bërë një vorbullë e madhe diskutimi, marrin nëpër gojë ambasadoren amerikane, sekretarin e shtetit”,-u shpreh Rama.
