Kreu i Partisë Demokratike, Sali Berisha, pasi ka firmosur marrëveshjen e bashkëpunimit me PDBNJ-në është pyetur nga gazetarët se si e komenton heshtjen e ambasadores amerikane mbi arrestimin e ish-zyrtarit të FBI McGonigal dhe takimet me Ramën.
Berisha thotë se nuk e di me siguri se cili është roli i Kim në aferën Rama-McGonigal ndërsa kujton intervistën e ambasadores amerikane e cila ka thënë se FBI ka kryer hetime përpara se ish-zyrtari i FB-së të arrestohej.
“Hetimi do të jetë kompleks. Oleg Deripaska ka arritur gjer në statusin e investitorit strategjik në Shqipëri. Kjo është e vërteta.
Përveç të tjerash gjithçka do të hetohet. Dhe këtu ne nuk heqim dorë.
Lidhur me zonjën Kim, dihet botërisht qëndrimi im ndaj saj dhe i saj ndaj meje.
Nuk mund të them se cili është roli i saj në aferën Rama-McGonigal, i takon drejtësisë në SHBA të bëjë hetimin e përgjithshëm.
Ka vetëm një deklaratë, të cilën nëse u kujtohet, unë i jam përgjigjur flakë për flakë.
Në një nga intervistat e saj, ajo shprehet se ka bërë hetime edhe FBI.
Në këtë intervistë, ajo tha atë që DASH nuk e ka thënë kurrë. Tani që del lobimi i McGonigal, tani e din ajo nëse e përdori për të mbuluar gënjeshtrat e saj ndaj qeverisë amerikane për personin tim, unë ia la për hetim drejtësisë së SHBA. Ajo është qytetare e atij vendi mik dhe ata do e shqyrtojnë këtë punë,-deklaron Berisha./Opinion.al
