Një 31-vjeçar me inicialet K. A ka rënë në prangat e policisë pasi në automjetin e tij i cili është gjetur i parkuar në lagjen nr. 1 në Durrës janë gjetur sasi lëndësh narkotike heroinë dhe kokainë si dhe mjete për përdorimin e tyre.
Policia bën me dije se janë sekuestruar lëndët narkotike, mjetet, një automjet dhe një celular.
31-vjeçari akuzohet për veprën penale “Prodhimi dhe shitja e narkotikëve”.
“Si rezultat i administrimit të menjëhershëm të informacioneve të siguruara nga inteligjenca policore, për një rast të veprimtarisë kriminale të shitjes në doza, të lëndëve narkotike, në qytetin e Durrësit, specialistët e Seksionit për Hetimin e Narkotikëve të DVP Durrës finalizuan një tjetër episod të megaoperacionit policor të koduar “Tempulli”.
Nga kontrolli në automjetin e shtetasit K. A., të parkuar në lagjen nr. 1, Durrës, shërbimet e Policisë gjetën sasi të lëndëve narkotike heroinë dhe kokainë, si dhe mjete për përdorimin e tyre, që posedoheshin nga ky shtetas, me qëllim shitjen. Lëndët dhe mjetet u sekuestruan si provë materiale, bashkë me automjetin dhe me celularin e këtij shtetasi.
Në përfundim të veprimeve procedurale u arrestua në flagrancë shtetasi K. A., 31 vjeç, banues në Gramsh, për veprën penale “Prodhimi dhe shitja e narkotikëve”,” thuhet ndër të tjera në njoftimin e policisë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
